Martes. 18.09.2018 |
El tiempo
Martes. 18.09.2018
El tiempo

Veterinaria recibe os avaliadores europeos o 24 cos deberes feitos

Quirófano do hospital Rof Codina. VITORIA RODRÍGUEZ
Quirófano do hospital Rof Codina. VITORIA RODRÍGUEZ

O decano sinala que o centro cumpre os 22 indicadores que esixe o exame da Eaeve

LUGO. O equipo de avaliadores que examinará a facultade de Veterinaria a finais de mes para renovar a acreditación da Asociación Europea de Centros de Educación Veterinaria (Eaeve nas súas siglas en francés) chegará a Lugo o día 24 deste mes. Na facultade todo está listo para recibilos e xa só queda cadrar a axenda dos avaliadores para que poidan visitar todas as instalacións vinculadas a esta institución universitaria e entrevistarse cos distintos colectivos implicados, desde profesores a persoal de administración e servizos, alumnos ou clínicas colaboradoras.

O decano da facultade, Germán Santamarina, sinala que están tranquilos respecto do que se vai a atopar a comisión examinadora, aínda que co nerviosismo lóxico dos preparativos da visita. «Cumprimos todos os indicadores que se esixen», apunta Santamarina, que sinala que se lles pide cumprir uns cocientes determinadas en aspectos como número de animais, profesorado, horas de prácticas, entre outros moitos requisitos.

Ademais, parte das instalacións do centro foron reformadas e melloradas, así como as do hospital veterinario Rof Codina, outro alicerce importante na avaliación.

A comisión da Eaeve estará composta por un coordinador, un alumno e especialistas das distintas áreas de coñecemento implicadas. Os membros proceden de Finlandia, Australia, Reino Unido, Francia, Italia, Noruega e Bélxica. Non hai ningún español porque unha das normas da avaliación require que non haxa examinadores do mesmo país que o centro avaliado.

Esta é a terceira vez que o centro universitario lucense sométese ao escrutinio da Eaeve. A primeira foi en 1998 e naquel entón a comisión atopou deficiencias que deberon corrixir nun prazo de dous anos. A acreditación chegou en 2000 logo de emendar as cuestións sinaladas polos examinadores. Como a acreditación é perecedoira, os centros deben pasar un exame cada dez anos -aínda que agora acurtouse a sete- para demostrar que seguen cumprindo os estándares europeos, así que en 2008 a facultade volveu pasar polo transo.

O 29 coñecerase a primeira impresión

Os membros da comisión avaliadora chegarán a Lugo o día 24, aínda que esa xornada dedicarase unicamente á súa recepción. As visitas e entrevistas comezarán ao día seguinte, 25, e continuarán o 26 e o 27. O 28, último día de estancia en Lugo dos avaliadores, a comisión exporá ante unha representación da comunidade educativa da facultade as súas primeiras impresións, das que xa se poderá deducir, confía o decano, en que sentido irá a súa avaliación. Posteriormente, o centro recibirá un informe pormenorizado no que se especifica tanto os méritos como as deficiencias, se é que hai algunha.

Organización
A propia facultade de Veterinaria é a encargada de organizar e sufragar a viaxe e a estancia dos examinadores. Na presente anualidade do plan de actuación do Campus Terra, dotado con financiamento da Xunta, reservouse unha partida para este fin.

Veterinaria recibe os avaliadores europeos o 24 cos deberes feitos
Comentarios