A facultade de Veterinaria obtivo unha acreditación condicionada no proceso de avaliación europeo ao que se someteu o pasado mes de setembro para renovar o status do que gozaba desde 2008. Esta figura supón que o centro universitario lucense obtén o visto e prace da Eaeve (Asociación Europea de Centros de Educación Veterinaria) -o organismo que realiza o exame e que referenda a acreditación- co compromiso de emendar as deficiencias que atoparon os avaliadores que se desprazaron a Lugo para levar a cabo a auditoría. Para obter a acreditación condicionada non pode haber máis que unha carencia das consideradas importantes, aínda que si poden sumarse outras leves.
A falta de coñecer con máis detalle o informe definitivo que realizou a Eaeve, dáse por feito que esa carencia se centra nunha casuística insuficiente de gando porcino e equino, é dicir, que a Eaeve considera que o alumnado non ve suficientes casos de porcos e cabalos durante a súa formación.
A facultade lucense recibiu recentemente un comunicado no que se lle informa da resolución alcanzada polo Ecove (Comité Europeo de Educación Veterinaria), o órgano que resolve sobre as acreditacións a partir dos informes provisionais emitidos pola comisión avaliadora. O Ecove actúa como árbitro final no procedemento de avaliación por mandato da Eaeve e da Federación Europea de Veterinarios.
Así, o Ecove ratificou a proposta do comité de avaliación e considera que existe unha única deficiencia maior, o que permite á facultade continuar co proceso de acreditación co compromiso de atender ás suxestións da Eaeve. Estas serán comunicadas nun informe que chegará proximamente e que motivará a convocatoria dunha xunta ordinaria de facultade para abordar as medidas que se deben tomar.
