Os residentes da Rúa Armiño, no barrio lucense da Piringalla, denuncian o "mal estado" da rúa e urxen ao Concello a tomar medidas canto antes. Os veciños séntense "totalmente discriminados" e aseguran que é "a única rúa do barrio" na que non se actúa. "Fai tan só uns días asfaltaron a Rúa Rei Chiquito, e xa con anterioridade arranxaron outras rúas próximas, pero a Rúa Armiño sempre queda sen reparar. Por esta zona asfaltaron incluso corredoiras polas que non pasa ninguén, pero a nós ignórannos e parécenos unha vergoña. Aquí pagamos os impostos exactamente igual que o resto dos veciños e non entendemos porque nos abandonan deste xeito", comentan.
Os afectados din que a vía "ten cada vez máis fochancas" e aseguran que cando chove "resulta complicado" transitar. Ademais, explican que a maleza invade a estrada e esixen ao goberno municipal que tome cartas no asunto para solucionar esta problemática. "Ter as leiras nesa situación é un perigo e ademais carrexa un problema de salubridade, xa que moitos solares son un niño de bichos e de ratas. Ás veces dá noxo ver como saen correndo e cruzan a estrada", sinalan.
Os veciños xa mostraron as súas queixas outras veces e lamentan que non se tiveron en conta. "Cada vez que pedimos explicacións póñennos algún tipo de parche para que quedemos contentos, pero o que teñen que facer é asfaltar a rúa dunha vez, do mesmo xeito que fixeron co resto do barrio".
Desde a concellaría de infraestruturas, que dirixe o edil Alexandre Penas, afirman con todo que o departamento municipal ten en conta todas as demandas veciñais e apuntan que se está actuando "en función do estado das vías". Segundo din, no que vai do actual mandato levaron a cabo un total de 23 obras de asfaltado en diferentes puntos da cidade, moitos deles no barrio da Piringalla, cun investimento que supera os 600.000 euros.
Na Rúa Armiño, en concreto, a Concellaría de Infraestruturas non descarta realizar proximamente traballos de roza e de mellora do firme, aínda que polo momento non ten previsto adxudicar a obra para levar a cabo o asfaltado da rúa, asegura.
