Os veciños de A Milagrosa da contorna da rúa Luís Seoane levan meses denunciando o estado de abandono que sofre a rúa e a desatención do Concello, con situacións que incluso supoñen un risco para a seguridade dos viandantes.
Hai case ano e medio que estes cidadáns viron como nunha das beirarrúas instalábanse uns valos cun precinto policial debido a uns desprendementos sobre a beirarrúa de cascotes da fachada dunha casa que leva moitos anos en estado de abandono. Co tempo e a imposibilidade de utilizar a beirarrúa, o precinto policial foi roto e os valos quedaron abandonadas contra o edificio, sen que o problema de seguridade chegase a solucionarse.
Pero, para desazón dos veciños, a situación volve a hora a repetirse na beirarrúa de en fronte. De novo a situación de ruína doutra vivenda, a que fai esquina entre Luís Seoane e Xulia Miguillón, obrigou a pechar o paso pola beirarrúa con valos e precinto policial. Pero esta vez, ademais, o tramo pechado é no que están situados os colectores do lixo que han de usar a diario os veciños.
Nestas circunstancias, era previsible que os valos acabasen apartadas e o precinto roto. Tardou pouco en cumprirse a previsión: practicamente ao día seguinte de establecerse o peche, este xa estaba invalidado e desde entón están alí os valos e o que queda do precinto policial.
"O problema é dobre", comenta un veciño indignado coa situación, "porque por unha banda está o perigo da xente que circula pola beirarrúa, xa que o problema dos desprendementos da vivenda en ruínas non foi solucionado, e doutra banda está o problema estético. O aspecto da rúa é impresentable de xeito evidente". Por iso, reclaman do Concello unha actuación urxente que arranxe o problema.
