Os veciños de tres barrios de Bocamaos quéixanse de que o Concello de Lugo excluíunos das obras para dotar de rede de abastecemento de auga a esta parroquia, que se iniciaron a semana pasada.
As afectadas son unha vintena de casas dos barrios da Ponte, O Vilar e O Vilardón, que se atopan na estrada que vai desde Ramil ata a ponte de Ombreiro. Unha das súas propietarias afirmaba que "non é propio do século XXI" que sigan sen contar con auga da traída e que se teñan que abastecer de pozos particulares. Ademais criticaba que parte da parroquia vaia dispor do servizo e o resto non, cando recordaba que "pagamos os impostos como os demais".
As obras, iniciadas a semana pasada, están a executarse no tramo que vai desde Meilán pola estrada de Ombreiro, que discorre paralela ao río Miño, no noroeste do municipio de Lugo.
Desde a área de medio rural indicouse que esta é a primeira fase dun proxecto que estaba "comprometido hai tempo" cos veciños e precisouse que se hai demandas doutros residentes poderíase ampliar a traída ao resto da parroquia.
O Concello de Lugo destina máis de 115.000 euros a estas obras, que teñen un prazo de execución de dous meses. Ese importe supón un aforro de case 40.000 euros con respecto ao prezo de licitación. Este proxecto, xunto co da rede de abastecemento de Penarrubia, fináncianse con cargo ao Plan Único da Deputación Provincial.
O abastecemento de auga da rede pública nas parroquias está nunha fase moi inicial. Só teñen ese servizo algúns núcleos moi próximos á capital e incluso algúns polos que pasaba a traída tiveron que esperar anos para acceder ao servizo.
Foi o caso de Orbazai, por exemplo, onde os veciños presionaron para que se lle enganchase á rede xeral unha vez que as canalizacións pasaban polo pobo e os veciños incluso facilitaron no seu día que se puidese facer a infraestrutura.
