Aos veciños da rúa Tui séguelles custando pegar ollo polas noites. A existencia de varios locais de lecer nesta rúa, abertos toda a madrugada, está a causarlles insomnio porque a clientela, lonxe de consumir dentro dos bares, faio fóra na rúa onde pon música a todo volume causando un elevado ruído. "Este é un problema de fai xa moitos anos, que se activou agora, tras os peches da pandemia. Desde as once da noite ata as nove da mañá, é imposible durmir aquí. óuvese a xente gritando, tirando botellas e pondo música a todo volume a través dos móbiles, que apoian sobre os coches aparcados. O domingo de madrugada, por exemplo, estivemos a ouvir toda a noite rancheiras", asegurou un residente desta rúa.
Outro problema que se presenta con celebrar a festa na rúa é, segundo expuxo este veciño, o feito de que algunhas persoas ouriñen contra as fachadas dos edificios, co consecuente cheiro nas horas seguintes.
Ante esta situación, a veciñanza demanda máis vixilancia policial nesta rúa, tanto dentro dos locais de lecer como fose, para controlar este tipo de comportamentos denunciables.
De todos os xeitos, hai dez días, a Policía Local realizou unha inspección nun local desta rúa onde detectou, entre outras infraccións, que puña música a un gran volume a pesar de dispor dunha licenza de café-bar e non de pub e que tiña máquinas comecartos sen autorización.
