Propietarios de vivendas do centro histórico que tramitan a instalación de ascensores están a perder subvencións públicas pola dificultade que teñen para obter a licenza de obra, debido ao atasco que hai no Concello. Nalgúns casos, as convocatorias de axudas da Xunta e do Plan Estatal de Vivenda dan preferencia aos proxectos que xa dispoñen de permiso de obra e noutros é requisito imprescindible telo para acceder a elas.
Neste momento hai aberta unha convocatoria e algúns propietarios que xa o ano pasado quedaron sen subvención seguen sen dispor de licenza municipal, polo que, se non a conseguen antes do 21, volverán perdela. A opción é esperar á convocatoria do próximo ano, coa incerteza de se esta se produce, de se as condicións son as mesmas e de se o orzamento que se habilite será suficiente para cubrir a demanda. E co agravante de que os propietarios non poderán instalar o ascensor ata entón porque as bases establecen que as obras non poden estar iniciadas cando se solicita a subvención.
A situación é denunciada por propietarios -que rexeitan dar o seu nome por temor a que a tramitación das súas licenzas se complique máis-, por empresas instaladoras de ascensores, como Embarba, e por arquitectos, tanto a nivel colexial como particular, que piden non ser identificados pola mesma razón. Así mesmo, técnicos do Instituto Galego de Vivenda e Solo (IGVS) explicaron a través da delegación territorial da Xunta en Lugo que nas últimas semanas están a recibir moitas consultas por este motivo. "A recomendación que se dá é que agarden a ter a licenza e soliciten o ano que vén, pero que tampouco empecen a obra antes da convocatoria", explica a Xunta.
O problema da tardanza na concesión das licenzas non é novo nin descoñecido, e non afecta só aos ascensores, pero o feito de que supoña a perda de subvencións agrava a situación.
O propietario dunha vivenda do centro histórico explica que o ano pasado quedou sen unha axuda da Xunta de 35.000 euros (nun orzamento de 70.000 euros) dunha liña específica para ascensores que este ano non se convocou. "Dábase prioridade aos proxectos con licenza e despois iamos os demais. Aínda non mo comunicaron, pero no IGVS xa me dixeron que me van denegar a subvención porque a partida era de 1,5 millóns de euros e non chega para os proxectos que non teñen licenza", explica. Esta intervención espera o visto e prace municipal desde hai meses.
Agora, este propietario teme quedar fóra da convocatoria de axudas para áreas de rehabilitación integral, como é o centro histórico lucense, que inclúe obras de accesibilidade e eficiencia enerxética, entre outras, e finaliza o día 21. "Vou estar na mesma se non consigo a licenza antes. E se sucede iso e quero esperar ao ano que vén tampouco podo empezar a obra, co cal unha intervención de accesibilidade que se necesita, nun edificio no que hai varias vivendas, vai tardar o que non debería", afirma este veciño.
O seu caso non é único. A arquitecta Mónica Folgueira explica que un cliente esperaba licenza para colocar un ascensor en zona Pepri desde 2016 e obtívoa xusto antes do verán. Hugo Pardo, delegado en Lugo de Ascensores Embarba, sinala que un cliente conseguiu o 1 de agosto o permiso municipal que solicitara en outubro de 2016. "Pola información que nos deron, empezaron a tramitala en xuño deste ano. Hai casos nos que a xente non pode pedir a subvención e non sabe se o ano seguinte a vai haber, como vai saír e se os cartos chegan para todos", explica.
O Concello é consciente do atasco que hai en licenzas e, tras as queixas do sector da construción, recentemente incorporou a dous arquitectos e anunciou outras medidas, como o apoio do persoal da empresa municipal de vivenda e chan. Destaca, ademais, que se dá prioridade a proxectos que "indican ou xustifican" que teñen axudas solicitadas.
