Vázquez acusa a Arroxo de "desprezar" os veciños e tratalos con "soberbia"

As friccións entre o tenente de alcalde, Rubén Arroxo, e o presidente da federación veciñal, Jesús Vázquez, -que se manifestaron a través da cruces de acusacións en medios redes sociais ao longo desta semana- subiron este venres a un novo nivel. Nun comunicado con formato de carta, Vázquez asegurou que tanto Arroxo como o edil de obras, Alexandre Penas, "desprezan" aos veciños" e trátanos con "displicencia, soberbia e altanería".

Negou categoricamente que lles propuxera unha "cacicada" despois de que Penas asegurase que, ao comezo do mandato municipal, Vázquez quixera lograr o control dunha porcentaxe do orzamento que manexa a súa concellaría . "Xamais vos pedín ningunha cacicada ou trato de favor e o que diga o contrario mente. Xamais vos pedín administrar ou xestionar ningunha obra e o que diga o contrario mente e mente a propósito. Si é certo que vos pido e pedireivos a implementación dos chamados orzamentos participativos, algo por certo que se suprimiu desde que chegastes ao goberno municipal", insistiu dirixíndose a ambos.

Cre que Arroxo ten "fixación" por el. "Son o centro da túa vida e a túa gran preocupación. A verdade é que me inquietas porque un problema de fixación cara á miña persoa pode levarche a problemas de saúde mental, algo que de ningún modo desexo para ti", di.

Na misiva chama indistintamente a Penas "monaguillo" ou "escudeiro" do tenente de alcalde, pero a ambos lles atribúe a capacidade de ser "artistas na arte do engano" e de desviar "a a atención" dos lucenses dos problemas que realmente lles preocupan. "Creades cortinas de fume para que a xente non fale de obras, iluminación, participación ou do bus urbano. Así, tratades de conseguir que non se aprecie a vosa incompetencia e ineptitude á hora de xestionar os recursos públicos. Conseguistes no tema do bus urbano algo que é imposible de superar: que os buses vaian completamente baleiros e que as queixas se estendan por todas as zonas da cidade", apunta.

Vázquez dedica unha parte da carta a recordar aos dous nacionalistas que, complementaria á democracia representativa que exercen os políticos, está a participativa, que é a que el exerce. Tamén lle pide a Arroxo que explique exactamente que inxurias lle atribúe. "Se te consideras inxuriado por algo (algo que é delito) xa sabes cal é o camiño que debes seguir", indica.

PARTICIPACIÓN. Alude Vázquez a un cambio de apreciación dos orzamentos participativos previo e posterior á entrada do BNG no goberno. Di que antes se lles enchía a boca" falando deles. "Desde que estades no goberno sufristes un profundo cambio ou transmutación, porque agora o que aplicades co tecido asociativo é a vosa vontade ditatorial porque non podedes controlalo e dirixilo", conclúe.

Ao seu xuízo, aos dous concelleiros móveos manterse no poder. "Convertéstesvos nuns profesionais da política, ben pagados por uns cidadáns aos que desprezades. Por iso entendo que para manter o voso status esteades dispostos a calquera cousa", dilles.

Vázquez di a Arroxo que se o seu partido xa lle concedeu permiso para reunirse coa federación veciñal e deixa de ser "un monicreque ou marioneta" poña día e hora á súa reunión para falar da reforma das liñas de buses "feita desde a incompetencia e ineptitude"». A federación veciñal ten intención de convocar unha manifestación contra a reforma do bus.