Os pacientes da cota dunha médica do centro de saúde de Fingoi que leva medio ano de baixa quéixanse de que, durante todo este tempo, o Sergas non puxo a un médico que a substituíse, co cal os pacientes son derivados a outros doutores, con praza no centro e con horario de mañá ou tarde, que cambian dependendo do día en que se solicite a cita.
Isto supón que, desde o pasado mes de decembro, os pacientes da médica de baixa non teñen un médico de familia fixo que os atenda e que lles faga un seguimento personalizado do seu estado de saúde, o que se traduce nun déficit da calidade asistencial, din.
"Non é o mesmo que te vexa un médico calquera, o que lle toque por quenda, que quen te vexa sexa o teu médico de familia, o que te coñece e o que sabe perfectamente os problemas que tes. Se o Sergas non cobre esa praza, os usuarios vémonos prexudicados porque quedamos sen a figura do médico de familia, que é a base da asistencia sanitaria", opina unha muller que afirma que presentou unha queixa ao Sergas por esta cuestión en marzo e aínda non recibiu resposta ao seu escrito.
O Sergas, pola súa banda, recoñece que non se cobren as substitucións por falta de médicos nas listas de contratación. Por iso "cóbrese a ausencia mediante prolongación de xornada".
Actualmente, este centro conta cun persoal de dezaseis médicos.
