A Universidade de Santiago (USC) puxo en macha na facultade de Veterinaria de Lugo un programa formativo en experimentación animal pioneiro en Galicia. Formalizaron a súa inscrición máis dun centenar de persoas nos cursos de roedores e lagomorfos e 20 noutras especies.
A directora do Centro de Estudos Propios da USC, Ana Díaz; a xefa do departamento de Formación de Agacal, dependente da Consellería de Medio Rural, María Otero Reboiras, e a adxunta ao Vicerreitorado de Coordinación do Campus de Lugo para Investigación, Transferencia e Innovación, Elvira López Mosquera, participaron este mércores na sesión de apertura do programa, que está estruturado en varios cursos e que se reparte en máis dunha ducia de módulos.
A oferta desta formación específica por parte da USC pretende dar resposta ás esixencias recollidas na orde ECC/566/2015, que, coa finalidade de garantir a protección e o benestar dos animais, establece os requisitos de capacitación que debe cumprir o persoal que manexe animais con fins de experimentación e outros fins científicos, incluíndo a docencia.
O programa formativo está composto por 14 cursos de formación continua
A oferta de formación para conseguir estas capacitacións é "moi escasa en Galicia", apunta a USC, que destaca que gran parte da demanda se atopa dentro da comunidade universitaria, aínda que tamén en hospitais, centros de investigación e centros de formación profesional.
O programa formativo está composto por 14 cursos de formación continua para conseguir as capacitacións en diversas funcións: coidado dos animais, eutanasia e realización de procedementos, en todas especies animais recollidas na lexislación vixente.
A parte teórico-práctica estrutúrase en módulos para adquirir os coñecementos e destrezas necesarios para desempeñar de xeito autónomo esas funcións, cumprindo os requisitos que establece a orde ministerial e que permiten obter un diploma que garanta a superación dos cursos.
Unha vez acreditada a parte teórico-práctica dun curso, o alumno debe facer unha segunda fase que consiste na realización dun traballo baixo supervisión, desenvolvendo as funcións estudadas nunha contorna real de traballo baixo o seguimento dun profesional competente. Cando ambas as fases estean superadas, a Xunta expedirá un documento que certifica a capacitación correspondente.
