O Aula de Produtos Lácteos e Tecnoloxías Alimentarias (APLTA) da Universidade de Santiago de Compostela (USC), con sede no campus de Lugo, colabora co Centro Tecnolóxico da Carne nun proxecto da cooperativa galega Amarelante para o desenvolvemento de novos produtos "da dieta atlántica derivados da castaña".
O obxectivo desta iniciativa de I+D+i, que se desenvolverá durante tres anos -grazas ao financiamento de fondos europeos do Feader, dentro do programa de desenvolvemento rural de Galicia-, "é o deseño e a elaboración de bebidas vexetais derivadas da castaña", segundo informa a USC.
Ese proxecto, no que "traballarán conxuntamente as tres entidades", busca tamén a "recuperación de bosques de castiñeiros en estado de abandono" na contorna de Manzaneda, precisamente para reactivar a "produción de castañas de calidade" nesa zona.
Con respecto a esta iniciativa de I+D+i, "comezará a dar os seus primeiros pasos en datas próximas" e , durante os próximos tres anos, o Aula de Produtos Lácteos ocuparase da "planificación das receitas dos novos produtos, así como do estudo e da aplicación dos tratamentos tecnolóxicos adecuados".
Trátase de conseguir "produtos de calidade desde o punto de vista nutricional, pero tamén sensorial", ademais de aumentar na medida do posible "a súa vida útil".
