Aqueles mozos de entre 18 e 31 anos de idade da provincia de Lugo, e incluso limítrofes, que teñan unha idea de negocio e precisen asesoramento para desenvolvela poden acollerse ao programa Explorer que ten en marcha a USC no Campus Terra. O prazo de matrícula está aberto ata o próximo día 16 deste mes.
Este programa, que xa suma varias edicións, supuxo unha lombeirada inicial para proxectos de éxito como Innogando, LegalMit, Anzol, Aleutos ou Peral Project.
A responsable da área de Valorización, Transferencia e Emprendemento do campus de Lugo, Patricia González, destacou "a formación transversal e o deseño dun modelo de negocio" que supón Explorer.
Este programa ofrece gratuitamente aos participantes 12 sesións semanais, que serán telemáticas, nas que "poderán validar as ideas para facer viable un proxecto emprendedor", segundo explicou Patricia González. Serán asesorados por mentores.
Poderán concorrer ata unha vintena de proxectos, tanto individuais como de grupo, neste caso con cinco membros como máximo. Se algún deses integrantes ten menos de 18 anos ou máis de 31 non terían problema. Non precisan vinculación coa USC para poder participar.
Xunto á formación online en innovación, liderado, finanzas, mercadotecnia ou modelos de negocio, entre outros, os seleccionados poderán acceder ao Explorer Space da USC no Campus Terra, un centro de coworking no que desenvolverán as súas ideas, conectarán con outros emprendedores e recibirán asesoramento e mentorización personalizado para o seu proxecto.
Este programa está promovido polo Banco Santander coa participación da USC e a Secretaría Xeral de Emprego da Xunta.
Ademais conta coa colaboración da Fundación CEL, que ofrece aos mellores proxectos incubación gratuíta durante tres meses para o seu desenvolvemento.
terra creative jam. Antes da posta en marcha do programa Explorer, o Campus Terra, xunto á incubadora Lug Open Factory, organizará os días 15 e 16 na facultade de Administración e Dirección de Empresas (Ade) de Lugo a segunda edición do evento Terra Creative Jam-Cara ou Rural do 2030, que é "de creación e construción de prototipos para abordar problemas sociais", segundo indicou Patricia González.
Os participantes -hai 35 prazas- poderán desenvolver ideas para un rural sostible, adaptado ás novas tecnoloxías, no horizonte 2030.
O equipo gañador nestas xornadas contará cunha praza para desenvolver a súa idea dentro do programa Explorer e no de incubación Atlantic Youth Creative Hubs (AYCH), no que poderá facer unha residencia e prácticas internacionais.
