O reitor da USC, Antonio López, foi claro e rotundo á hora de adiantar os seus plans para o
Con estas tres frases, Antonio López quixo este venres —en conferencia de prensa— desmentir por completo que o pazo de Montenegro vaia quedar baleiro e sen uso ao trasladarse o persoal de Cultura a outras oficinas do edificio Intercentros, no campus.
"Isto é só un cambio dun uso administrativo que tiña este edificio e que agora se vai levar ao campus simplemente porque é máis cómodo, para a xestión, estar alí cerca das facultades, do persoal administrativo e de servizos, do alumnado e do profesorado. E o pazo seguirá manténdose para un uso protocolario, de representación institucional e tamén para actividades culturais, para manter o vínculo coa cidade e mesmo reforzalo", explicou o reitor, que comparou esta situación coas funcións do pazo de Raxoi e San Caetano.
Antonio López negou tamén que se fose a pechar o museo do templo de Mitra. Á súa vez, o vicerreitor do campus de Lugo, Francisco Fraga —tamén presente na rolda de prensa xunto con Elvira López, delegada da USC no Campus Terra— adiantou que esta instalación se integrará, en pouco tempo, á Rede de Museos da Xunta.
Proxectos
O reitor da USC aproveitou a súa visita a Lugo para expoñer os proxectos que barallan para o pazo de Montenegro durante os próximos meses. O máis inmediato será a creación dunha tenda con artigos da USC, que abrirá antes do Nadal.
Á súa vez, crearase o programa cultural Impluvium —en referencia a un estanque de recollida de auga de choiva que había nos atrios das casas romanas—, ao que se acollerán varias actividades e exposicións. Este programa convivirá co que se está levando a cabo este mes, DivúlgaT, e co xa tradicional Lugo Cultural.
O reitor anunciou, así mesmo, que o pazo acollerá varios cursos, organizados pola Xunta, dentro do plan Corresponsables, a través do cal darase formación en primeiros auxilios e outros temas e avanzou que por alí "pasarán máis de 500 persoas en cinco meses". Ademais, o pazo acollerá unha reunión de directores de hospitais veterinarios de España.
Un docente por cada dez alumnos
O reitor da USC quixo demostrar este venres o compromiso que existe co campus de Lugo e, para iso, botou man dunha serie de datos e porcentaxes. Por exemplo, o cociente de profesores por alumnos, que é, segundo López, dun "docente por cada dez estudantes, case a metade do que hai en Santiago".
No Campus Terra hai pois máis profesorado por alumno que no de Santiago a pesar de que a cifra de matriculados é máis baixa. "Os matriculados representan en Lugo só un 15 por cento do total do alumnado da USC, mentras que o cadro docente deste campus supón o 22 por cento do profesorado universitario", indicou o reitor.
Antonio López tamén afirmou que se crearon 57 prazas de axudante doutor nos últimos catro anos no campus de Lugo, dun total de 205 na USC. Neste mesmo tempo, tamén saíron 21 prazas de profesorado contratado doutor e outras 22, de catedrático.
Esta realidade proba, segundo Antonio López, o compromiso da USC co campus de Lugo á vez que agradeceu a colaboración sempre mostrada pola Deputación e o Concello.
