O sindicato Unións Agrarias (UUAA) informou de que o vindeiro venres, día 22 de outubro, iniciará en Lugo un calendario de mobilizacións para reclamar unha solución á situación “crítica” pola que está a pasar o sector cárnico en Galicia, como consecuencia da subida dos custos de produción, que non se ve reflectida no prezo dos tenreiros.
O responsable de Agricultura e Gandería Extensiva de Unións Agrarias, Xosé Ramón González, explicou este venres en Lugo que as explotacións se atopan nunha situación “delicada” e, nalgúns casos, realmente “preocupante”, porque están a vender por baixo de custos de produción e os números non dan.
Segundo González, agora mesmo os produtores de carne galego están a cobrar ao redor de douscentos euros menos por cada tenreiro que ao comezo da pandemia, unha situación que considera “insostible”.
“é unha situación preocupante para as máis de 6.000 explotacións de carne que hai na provincia de Lugo, moitas das cales son o verdadeiro sustento de zonas cunha demografía delicada”, explicou, como sucede en municipios de montaña.
Recordou que a Consellería do Medio Rural é, neste caso, “a administración competente”, polo que pide unha solución “inmediata”, aínda que sexa de forma conxuntural, para buscar no futuro outro tipo de solucións de carácter “estrutural”.
A primeira concentración producirase o venres 22 ante a sede da Delegación Territorial da Xunta de Galicia en Lugo, sobre as 12:00 horas, pero se reproducirá esta forma de protesta en Ourense e A Coruña en venres sucesivos.
