Pacientes pendentes dunha resonancia magnética están a ser citados estes días para facerlla na unidade móbil do Sergas, instalada no recinto do Hula. O equipo, que serve para reforzar os fixos cos que conta o hospital e alixeirar a longa lista de espera desa proba, aínda permanecerá en Lugo polo menos unha semana máis.
A resonancia magnética móbil está operativa mañá e tarde e tamén os fins de semana. Precisamente o feito de ser citados para un sábado ou domingo chamou a atención dalgúns pacientes que dubidaban de que esa convocatoria fose correcta.
A lista de espera de probas diagnósticas adoita ser longa e a de resonancia magnética non é unha excepción; pero, ademais, nos últimos meses os equipos de resonancia sufriron varias avarías, o que contribuíu a aumentala aínda máis.
Esa é a razón pola que se recorreu unidade móbil, un método ao que moitos sistemas de saúde recorren cando se fan obras nos hospitais que afectan as zonas onde se colocan estes equipos ou cando se quere reducir a lista de pacientes en espera.
Neste caso, a resonancia do Sergas leva xa unha semana instalada na parte traseira do centro hospitalario e permanecerá ata o domingo 18, funcionando a diario.
É a primeira vez que o Hula bota man deste recurso. O Sergas conta tamén con outras unidades móbiles para distintas probas de imaxe, como a de mamografías.
