Casar dunha forma orixinal , incluso en versión Halloween, é posible. Así o demostrou o showroom Cásate conmigo, clausurado este domingo no restaurante Val dos Soños, do grupo A Palloza, logo dun fin de semana no que a empresa Hasta en un Iglú, dirixida por Paula Rábade e dedicada á organización de vodas, pensou en todos os detalles para que os noivos fagan as mellores eleccións á hora de contratar os distintos servizos dese día determinante para as súas vidas.
Voos de dron, música en directo con The Karaoke Experience, degustacións de doces e xamón e recepcións con cava aos noivos sucedéronse ao longo de toda a xornada na que o máis destacado foi, sen dúbida, o esperado desfile de moda nupcial e moda íntima. Un desfile que, por certo, chamou poderosamente a atención a todos os asistentes tanto pola vistosidade e elegancia dos catorce vestidos de Rosa Clará, todos eles da colección de 2016, como pola creatividade do estilista Diego Rosso, que vestiu a unha das modelos en directo, sen esquecerse tampouco do vestido elaborado con tul e invitacións de voda en distintos formatos.
Con todo, houbo algo que impresionou moito máis ao público: tratouse da maquillaxe e o peiteado que lucían as modelos, moi ao estilo Halloween e que recordaba as noivas cadáver mexicanas. Unha delas, ademais, saíu á pasarela acompañada dunha dama de honra moi especial, unha cerdita vietnamita que, a pesar de intentalo, non soportou o vestido de noiva-tutú que lle tiña preparado a organización. Ademais da vestimenta nupcial, tamén houbo un oco para a moda íntima da noite de vodas, podendo verse tanto conxuntos de lencería como picardías, xunto con algo de moda interior masculina. O desfile pechouse cun sorteo de agasallos.
Empresas de blanqueamiento dental, detalles, animación, restauración, música, viaxes e ornamentación floral completaron a oferta dos vinte e catro expositores, na que quedou clara unha tendencia: a volta ao estilo campestre, con ramos de noiva desiguais, por exemplo. Para ramos e ornamentación, un dos aspectos que máis se coidan nun enlace, presentou moitas e coidadas propostas Musa Floristas, unha de cuxas especialidades é, precisamente, as noivas.
