Un total de 26 restaurantes da capital lucense sumaranse a partir deste sábado a unha iniciativa do Concello e a empresa Urbaser coa que se pretende reducir a cantidade de alimentos que a diario se tiran nestes establecementos e mediante a cal se ofrecerá aos clientes a posibilidade de levar nunha friameira a comida que lles sobra no prato. Que che re-aproveite! é o título desta iniciativa que se desenvolverá ata o 27 de novembro, coincidindo coa Semana Europea de Prevención de Residuos e que foi presentada este xoves no concello por Daniel Piñeiro, concelleiro de desenvolvemento sostible; Jaime Martínez, de Urbaser, e Jesús Cotelo, de Novotec Consultores. Este último xustificou esta campaña debido a que unha estatística indica que "o 32% dos residuos municipais son restos de alimentos" e que en hostalería representan o 14% do lixo e nos fogares, o 42%, "polo que é moi necesaria a concienciación", comentou.
Cotelo tamén incide no papel que deben de ter os restaurantes neste labor, xa que asegura que hai estudos que indican que cada local desperdicia de media uns 3.000 euros ao arroxar alimentos ao lixo. Por iso, a campaña que se inicia este sábado en Lugo inclúe a repartición de friameiras, bolsas, cubremanteis e adhesivos indicativos aos restaurantes colaboradores para promocionar a práctica de levar as sobras, moi común nalgúns países europeos como Francia ou Gran Bretaña e que está a comezar a popularizarse en Lugo.
O chef Héctor López preparará o luns no mercado de Quiroga Ballestestos receitas con comida sobrante
De feito, desde algúns restaurantes consultados asegúrase que cada vez máis clientes piden levar a comida, sobre todo cando se trata de pratos nos que pode sobrar máis cantidade, como os arroces. Armando Méndez, de Os Cachivaches, explica que aproximadamente o 60% das persoas ás que se lles ofrece a posibilidade de envolver o que sobra do prato deciden levalo e en que a maioría dos casos son pratos de arroz.
Cre ademais que esta práctica debería ser incentivada polo propio camareiro, xa que asegura que "todo o que volve da mesa á cociña vai ao lixo e é unha pena ter que tirar comida cando hai tantas persoas que pasan fame", explica.
Pola súa banda Nicolás Vázquez, do restaurante Campos, tamén asegura que cada vez máis clientes piden levar o que lles sobra do prato, "ou ben porque lles gustou ou para aproveitalo despois en casa". En cambio, discrepa coa estatística sobre a cantidade de comida que se desperdicia en hostalería, dado que explica que no seu restaurante a maioría dos alimentos cómpranse ao día, como o peixe, e acaban por esgotarse nesa xornada, polo que apenas hai sobras.
O 60% das persoas ás que se lles ofrece a posibilidade de envolverlle o que sobra do prato deciden levalo
Da mesma opinión é Óscar López, do restaurante O Figón, quen comenta que tampouco adoitan tirar comida e que, como ocorre no resto de locais, aprovéitanse pratos do menú para servilos tamén como tapa, de modo que acaban esgotándose ao final do día.
RE-RECEITAS. Con todo, no caso de que haxa sobras, esta campaña tamén propón que os locais deseñen re-receitas para aproveitar aquela comida cociñada e que pode reutilizarse. Héctor López, chef do restaurante España, explica que é sinxelo preparar pratos con alimentos reciclados, como o lacón sobrante dun cocido, "co que se poden facer unhas croquetas", ou cun polbo xa cociñado que estea cortado, que tamén pode converterse nun prato diferente.
De feito, Héctor López colabora tamén noutra campaña promovida pola Consellería de Medio Ambiente e enmarcada nesta semana europea para reducir os residuos e que consistirá nun showcooking nas prazas de abastos de Lugo, Ourense, Pontevedra e Santiago, onde este cociñeiro preparará receitas a partir de comida sobrante. O acto na capital lucense será o luns 21, ás once da mañá, no mercado de Quiroga Ballesteros.
