O xardín de rochas que está a resultar da evolución das obras da parcela traseira de San Fernando é obxecto de polémica. Desde a asociación Lugo Monumental expoñen que se está "desaproveitando unha gran extensión, precisamente nun lugar no que se poderían pór en marcha diferentes alternativas", unha opinión que comparten tanto os veciños da zona como os negocios locais, partidarios de substituír ese proxecto "sen lóxica" por un parque infantil ou, incluso, un parking gratuíto.
"Eses xardíns teñen sentido en sitios onde se pretende facer unha separación ou impedir o paso, non aí, onde se desaproveitan máis de 1.000 metros cadrados que nos farían falta", expón Luís Latorre, presidente da asociación Lugo Monumental.
"Estamos a recuperar esa extensión para sacarlle fotos, xa que a reforma, se non cambia, non terá ningún tipo de utilidade. O centro histórico apenas ten parques infantís, o de Campo Castelo sempre está saturado, os nenos necesitan outra zona de xogos", continúa Latorre.
Así mesmo, o presidente asegura que presentarán esta alternativa "formalmente" dentro das propostas dos orzamentos participativos, unha práctica que xa levaron a cabo con anterioridade, mediante a petición doutros parques noutras zonas nas que tamén "escasean".
"A colocación de aparellos biosaludables para facer exercicio, ou un xardín con céspede e bancos parécennos opcións moito máis adecuadas", conclúe Luís Latorre.
Pola súa banda, os veciños da zona esperan "que non sexa tarde para encamiñar a situación", xa que ao seu xuízo, "ese espazo debería destinarse a mellorar as prestacións para os nenos". Outra das opcións que se baralla por parte dos negocios locais é a de incluír nese espazo un aparcadoiro gratuíto. "En vez do xardín rochoso poderían pór un parking, no centro nunca atopas un sitio", explican.
Esta obra tampouco convence ao BNG. A concelleira nacionalista Maite Ferreiro focalizou o seu descontento na situación dos nenos, os que, asegura, "gardan colas para subir aos xogos" ante a insuficiencia de instalacións.
