Alejandro López, o mozo lucense que presidirá a Asociación Española de Afectados por Intervencións de Cirurxía Refractiva, defenderá este mércores, ante o Parlamento británico, un maior control deste tipo de operacións, nas que se utilizan distintos tipos de láser. A xornada parlamentaria de hoxe en Londres foi bautizada como Bad eye day (Día do ollo malo) e Alejandro López intervirá en representación das vítimas españolas destas intervencións.
O acto foi promovido pola activista británica Sasha Rodoy, dentro da campaña My beatiful eyes (Os meus preciosos ollos) co fin de obter o apoio dos parlamentarios para presionar ao Goberno inglés para que faga unha revisión exhaustiva e estableza unha maior regulación da cirurxía refractiva ocular, aplicable en distintos tipos de defectos de visión.
A cirurxía refractiva ocular comprende unha serie de procedementos cirúrxicos nos que se buscar eliminar a necesidade de lentes ou lentes de contacto. Segundo a Asociación Española de Afectados por Intervencións de Cirurxías Refractivas, as taxas de secuelas irreversibles, nestas operacións, afectan a cerca do 30% dos intervidos.
A campaña My beatiful eyes está apoiada polo deputado laborista John McDonnel. Á xornada deste mércores, na Cámara da Comúns británica, acudirán vítimas do Reino Unido, Irlanda, Portugal e España, que exporán a súa situación ante os deputados e a prensa.