Un home de 47 anos de idade, veciño de Lugo, aceptou o martes unha condena de cincuenta días de traballos en beneficio da comunidade por patear á súa compañeira sentimental nun pub e propinarlle varias puñadas.
A agresión produciuse sobre as doce e media da noite do 8 de decembro de 2014, cando o acusado e a súa parella estaban no interior dun establecemento de hostalería da rúa Mariña Española.
O fiscal explica no seu escrito que, "sen mediar discusión nin provocación algunha", o acusado propinoulle á muller varias patadas e puñadas en diversas partes do corpo. A vítima sufriu policontusións e hematomas nun ollo e un brazo. Ao día seguinte destes feitos, o xulgado ditou unha orde de protección que prohibía ao acusado aproximarse á vítima ou comunicarse con ela.
O agresor foi detido e acusado dun delito de lesións no ámbito familiar, polo que a Fiscalía pedía inicialmente unha condena de dez meses de prisión. O home recoñeceu os feitos ante a xuíza do Penal 1 e chegou a un acordo de conformidade co ministerio público, que cambiou a súa petición inicial de cárcere por traballos en beneficio da comunidade durante cincuenta días.
Ademais, o home non poderá achegarse á vítima nin comunicarse con ela por ningún medio durante un período de dous anos.
