jueves. 13.08.2020 |
El tiempo
jueves. 13.08.2020
El tiempo

Un cole rural a dez minutos da muralla

Un espacio del aula de la asociación Nenea
Un espacio del aula de la asociación Nenea
Sete nenos asisten a diario á escola da asociación Nenea en San Xoán do Alto. O centro segue o plan de educación infantil, pero en contacto coa natureza e a arte

Educar en pleno contacto coa natureza e a arte a nenos de entre 2 e 6 anos que viven pleno centro urbano de Lugo é o obxectivo dun centro escolar que iniciou este curso a súa andaina na antiga escola rural de San Xoán do Alto da man da asociación Nenea. "Estamos a dez minutos en coche do centro e as familias ven que aquí os nenos poden aprender dun xeito diferente, porque todos os días facemos unha actividade fóra", asegura Bibiana Marful. Esta pedagoga é unha das impulsoras dun proxecto que segue o modelo das escolas bosque de Holanda e Reino Unido, e que conta co apoio do Concello, que lles facilitou o local e arranxou as instalacións para que o centro comezase a funcionar.

"Nenea, que é unha asociación sen ánimo de lucro, presentounos o proxecto e buscamos un local que puidese servir de aula. Vimos que a escola de San Xoán do Alto apenas se estaba a usar e, dacordo cos veciños, decidimos cedela para crear esta escola dá natureza", recorda o concelleiro da zona rural, Miguel Fernández, quen engade que o Concello financiou as obras de acondicionamento do local, mentres que Nenea puxo o material necesario para o centro.

Pola súa banda, Bibiana Marful explica que o proxecto de escola da natureza botou a andar hai uns meses con sete nenos, que acoden a diario de 9.00 a 15.00 horas, aínda que aclara que hai 22 familias asociadas que tamén participan noutras actividades que se organizan en colaboración con outras entidades ou durante o fin de semana. Así, indica que tras abonar unha cota de entrada, os socios poden optar por converterse en Familias Nenea e pagar 250 euros ao mes, o que dá dereito a escolarizar aos seus fillos no centro de San Xoán do Alto, ou ser Amigos Nenea, pagando unha pequena cota para poder asistir a cursos, talleres ou charlas, así como a actividades que desenvolven durante as vacacións escolares de Nadal ou Semana Santa.

Bibiana explica que os pais poden elixir este tipo de formación alternativa para os seus fillos porque a educación infantil non é obrigatoria, aínda que sinala que en Nenea cumpren os obxectivos do currículo oficial da Xunta para que os nenos salgan igual de preparados cando inicien a etapa de primaria. «Eles teñen que escribir e ler, pero van facendoo en base aos intereses deles, porque a aprendizaxe sempre prodúcese gozando», explica esta pedagoga, que traballa a diario cos nenos xunto coas súas compañeiras Zaika Álvarez Socorro e Coral López Vázquez.

Ademais, os pequenos do centro contan cun compañeiro especial, Lúa, un can que forma parte dun programa de educación con animais que desenvolven en colaboración coa USC.

Máis información sobre este proxecto na web de Nenea ou no teléfono 615 392 929

Un cole rural a dez minutos da muralla
comentarios