A recuperación do túnel achado na muralla en 2016 segue en suspenso polos desencontros entre a Xunta e o Concello. A Administración autonómica di que está á espera da licenza do Concello para poder actuar e este sostén que leva un ano esperando a que o Goberno galego pague 418 euros de taxas para a firma dun convenio e a concesión de licenza.
A Xunta cre que o Concello xoga ao descoido para bloquear a obra de musealización do túnel. Así, di que o Concello enviou o 3 de abril do 2018 un escrito reclamando o pago de taxas para a obra e que se lle respondeu uns días despois, o 13 en concreto, explicando que o pago xa se fixo, coa liquidación correspondente aos traballos de consolidación e rehabilitación do cubo VI, no que apareceu o túnel.
A Xunta di que só precisa, e que espera desde hai dous anos, que o Concello autorice a colocar un enrexado e iluminación ornamental. Para eses labores, di, propúxose un convenio, algo que non está condicionado ao pago de ningunha taxa, defende.
O Concello, en cambio, insiste en que a Xunta ten que pagar para facer esa obra na muralla. Sostén que non hai ningún enredo e que non vale o argumento da Xunta de que se trata de actuar nun terreo municipal.
Para musealizar o túnel, a Xunta debe pagar unha licenza, igual que para facer o colexio do Sagrado Corazón ou actuar noutros colexios que están en terreos do Concello, sostén o goberno municipal de Lugo.
O Concello propón unha solución alternativa: que a Xunta dea ao Concello o diñeiro que custará facer a obra, para que sexa a administración local a que se ocupe dos traballos.
Esa fórmula suporía, sostén o Concello, seguir a mesma fórmula que xa se usou co cuartel de San Fernando, edificio no que se pagaron a medias as obras, aínda que as fixo o Concello.
