O Tribunal Superior de Xustiza de Galicia (TSXG) acaba de rexeitar o recurso presentado polo sindicato de funcionarios municipais Ágora contra a aprobación dos orzamentos municipais de 2018 ao considerar que os desaxustes entre o persoal que figura nas contas e a Relación de Posto de Traballo (RPT) non é unha razón de peso como para anulalas.
"Parece excesivo, por contraproducente, declarar a nulidade dos orzamentos aprobados aínda cando se aprecie un claro e irregular desaxuste entre a RPT e o cadro de persoal, o que non obsta á necesaria esixencia de que se poña fin, dunha vez por todas, a esa discrepancia, introducindo na RPT as modificacións que, para ese efecto, sexan precisas", sinala a sentenza do alto tribunal.
Ademais, o fallo tamén desestima outro dos argumentos dados por Ágora para pedir a anulación das contas: que foron elaboradas por un órgano "manifestamente incompetente", que á vez tamén os fiscalizou. Con todo, o TSXG considera que "non cabe concluír que a elaboración e fiscalización dos orzamentos se realizou por órgano incompetente".
Outra sentenza obriga ao Concello a pagar un plus de produtividade a uns 80 policías locais que fixeron noites no ano 2017
As contas do Concello de 2018 foron aprobadas tras ser vinculadas a unha moción de confianza á alcaldesa e ademais de ser recorridas polo TSXG tamén recibiron alegacións por parte doutros sindicatos como a CSIF, nas que se expuñan os mesmos motivos de anulación que o tribunal galego acaba de desestimar.
Ademais, as anteriores contas do Concello aprobadas no pleno, as correspondentes a 2016, tamén foran recorridas polos sindicatos polos mesmos motivos e aínda está pendente unha resolución por parte do TSXG que, á vista deste fallo, todo parece indicar que tamén determinará a validez desas contas.
PRODUTIVIDADE. O Concello, en cambio, si acaba de asumir unha recente sentenza do tribunal do Contencioso número 2 de Lugo que ordena o pago do complemento de produtividade aos policías que fixeron noites durante o ano 2017 e que afecta a preto de 80 axentes.
