Un home de 48 anos de idade foi detido por axentes do Corpo Nacional de Policía (CNP) logo da pelexa que se produciu no barrio lucense da Milagrosa ao tropezar cunha muller cando fuxía logo de perpetrar un roubo con violencia e encerellarse con dous familiares dela, pai e fillo, que lle recriminaron que a tirou ao chan.
Ao final, tamén foi detido un novo de 24 anos –con múltiples antecedentes policiais e máis de dez detencións previas–, no seu caso por ameazas e lesións, por golpear ao suposto ladrón cun bastón de punta metálica.
Os feitos sucederon na tarde deste martes, cando un veciño de Lugo chamou ao teléfono 091 para pedir axuda porque fora obxecto dun roubo con violencia na zona da Milagrosa.
Segundo o seu relato, un home golpeouno e tirouno ao chan no portal do edificio no que estaba a traballar e, cando estaba tirado, propinoulle varias patadas para levar o diñeiro que tiña encima e dous móbiles.
Varias patrullas desprazáronse ao lugar indicado e o que se atoparon foi un "gran balbordo e moita xente apelotonada" nunha das rúas da Milagrosa.
Os axentes viron como un mozo golpeaba cun bastón de punta metálica ao suposto autor do roubo, mentres que outra persoa –o pai do rapaz–, sangraba abundantemente pola cabeza como consecuencia do golpe que recibira cunha táboa de madeira que tiña cravos nun dos seus extremos.
Tanto o mozo como o suposto autor do roubo foron detidos, mentres que o terceiro home tivo que recibir asistencia médica e déronlle oito puntos de sutura na cabeza.
A pelexa entre os tres homes comezou ao tropezar na súa fuxida o suposto ladrón cunha muller, que acabou tirada no chan, e os seus dous familiares acudiron de inmediato para recriminarllo.
Os dous móbiles roubados foron achados debaixo dun dos colectores de lixo que hai na rúa onde se produciu a pelexa.
O suposto ladrón pasou a disposición xudicial como investigado por un delito de roubo con violencia e outro de lesións, relacionado cunha pelexa na que se viu implicado a semana pasada no centro da cidade.
Pola súa banda, o mozo que o golpeou cun bastón quedou a disposición da autoridade xudicial como investigado por un delito de ameazas e lesións.
