A Policía Local denunciou o pasado fin de semana a un condutor bebido que circulaba de noite pola capital lucense e triplicou a taxa na proba de alcoholemia.
Segundo a información facilitada o luns polo portavoz do corpo, os feitos tiveron lugar na madrugada do sábado, cando unha patrulla do Grupo Operativo Nocturno estableceu varios filtros de seguridade viaria na capital lucense.
No transcurso destes dispositivos de control, os axentes déronlle o alto a un condutor que circulaba pola Praza Conde de Fontao, nas inmediacións da estación de tren. e comprobaron que presentaba síntomas de atoparse baixo os efectos do alcol. Ante esta situación, os axentes someteron ao home ás probas de alcoholemia, nas que arroxou un resultado de 0,73 miligramos por litro de aire expirado, o triplo do permitido por lei.
Os policías inmobilizaron o vehículo e instruíron dilixencias por un delito contra a seguridade viaria por condución baixo a influencia de bebidas alcohólicas, na modalidade de xuízo rápido. As dilixencias foron remitidas á autoridade xudicial.
