Mestre é unha palabra grande e Indalecio Fernández Groba é dos poucos que poden presumir de que os seus discípulos a utilicen para dirixirse a el. O músico sentiu este venres o agradecemento dos seus antigos alumnos, e o valor do seu legado, durante a homenaxe que lle dedicaron no Círculo das Artes.
Indalecio Fernández Groba dirixiu a Banda de Música de Lugo de 1979 a 1991 e naqueles anos coñeceulle Miguel Ángel Díaz Valdés, hoxe profesor de Música no instituto Ollos Grandes e que no seu día foi un dos moitos nenos aos que Groba ensinou música. As clases dábaas gratis, cada tarde, no local no que ensaiaba a Banda, un espazo contiguo ao Mercado ao que chegaban os cheiros do peixe, a carne e as verduras. "Era, sobre todo, unha persoa con enorme paciencia e capacidade de traballo", di Díaz Valdés ao recrear a memoria daquel Groba.
Daba dúas horas diarias de clase e formou a moitos lucenses que hoxe son profesores de Música en colexios, institutos e conservatorios. Non había entón en Lugo outro lugar no que aprender os instrumentos de vento e percusión e el ensinaba, a todo o que tiña interese, solfexo e a tocar clarinete, frauta, oboe, trompeta, trompa, tuba, trombón e percusión. Eran os instrumentos da Banda de Música e moitos daqueles nenos acabaron tamén na agrupación musical, na que continúan hoxe en día.
"Era unha persoa cunha enorme paciencia e capacidade de traballo", recorda Díaz Valdés, un dos seus discípulos
"Dirixindo a Banda era unha persoa firme e de carácter. Notábase que tiña moi claro como debía soar", recorda o hoxe profesor do Ollos Grandes. Na escola era, en tanto, unha persoa de enorme paciencia, rememoraba Díaz Valdés. "Tiña unha gran paciencia e a rutina consistía en que ía chamándonos ao despacho para tomarnos a lección, xa fose de solfexo ou de instrumento", recorda.
Eran moitos alumnos, "debiamos estar máis de 40 na clase" e el levaba todo o peso sobre os seus ombreiros, aínda que funcionaba unha especie de escola colaborativa, xa que os alumnos máis avanzados axudaban no ensino dos que empezaban.
COMPOSITOR
A Groba recórdaselle en Lugo polo seu paso pola Banda de Música e por aquela escola gratuíta que creou e que permitiu a moitos nenos aprender un instrumento, pero non só por iso. Fernández Groba é tamén un compositor recoñecido en Galicia e, de feito, no concerto do venres soou unha das súas pezas, 'Saúdo a Lugo'.
"Como compositor a min gústame, aínda que non se se son a persoa para valoralo, porque media o agarimo; con todo, creo que non é a faceta que máis lle preocupou a el", dicía este venres Valdés. Este profesor lucense é un máis dos discípulos de Groba e vinte deles subíronse ao escenario do Círculo das Artes para tocar xunto á Banda Filarmónica, e gaiteiros de Cantigas e Frores, na homenaxe.
"Repasando programas, vin que sempre había pasodobres, zarzuela e algunha obra galega", apunta Martínez Sabio
O concerto dirixiuno Iván Martínez Sabio, que está á fronte da Banda Filarmónica e deseñou un recital ao estilo dos que facía Groba cando estaba á fronte da Banda de Música de Lugo. "Repasando programas, vin que sempre había pasodobres, zarzuela e algunha obra galega", contaba Sabio, que a partir de aí fixo un programa coas pezas 'Pebida Graus', de Pascual Pérez Choví; 'A Lenda do Bico', de Reveriano Soutillo e Juan Vert; 'Danzas Polovstianas' de Alexander Borodin, e o pasodobre 'Saúdo a Lugo', do propio Fernández Groba.
O público respondeu de forma excepcional e o Círculo das Artes encheuse este venres como só o fai nas grandes ocasións, o que probou o gran recordo que Indaleció Fernández Groba deixou nos lucenses. á primeira fila convocouse ao homenaxeado, que xa asistira hai uns días, cunha gran predisposición, segundo contaba Iván Martínez Sabio, a un ensaio do concerto. Indalecio Fernández Groba, que se xubilou como director da Banda de Música da Coruña, regresou hai uns anos e agora vive en Lugo, a cidade á que dedicou tanta música.
