Liteyca comunicou ao comité de empresa o traspaso das labores de mantemento e instalación de redes para Telefónica a Comfica para seis provincias, incluída a de Lugo. Neste caso, afectará a máis de cen traballadores, entre contratos directos e indirectos.
O persoal da empresa de telecomunicacións ten en Lugo un equipo de 58 persoas. O secretario de industria de Comisións Obreiras e á súa vez traballador en excedencia de Liteyca, José Luís López Álvarez, recordou que todos os contratos directos serán subrogados, xa que esa circunstancia está recollida en convenio. Con todo, a empresa dá traballo a outras subcontratas do sector para as que non se aplica ese punto.
Liteyca é unha empresa nacida en Lugo en 1989 que asumiu desde os seus inicios o mantemento e instalación de redes para Telefónica. No caso da provincia faio de forma exclusiva. Co tempo, foise facendo co mesmo contrato noutras provincias, nalgún caso igualmente de forma exclusiva e, noutras, só de forma parcial.
En conxunto está presente en 26 provincias españolas e, en todas elas, presta servizo de construción, instalación e mantemento de redes, fixas e móbiles, para Telefónica. Así, asume o correcto funcionamento das redes de máis do 50% das telecomunicacións que se producen en España, tendo en conta que Telefónica, propietaria das redes, ademais de usalas para os seus propios servizos alúgaas a outras compañías telefónicas.
A morte do fundador de Liteyca abriu un período no que se empezou a cuestionar o futuro da empresa. Non está claro cal é o motivo da decisión dos seus herdeiros de vendela, xa que se expón a posibilidade de que fose para dividir a herdanza, pero tamén se alude a que Telefónica quere reducir o número de contratas que operan para ela en España. Na actualidade, son 16 pero segundo algunhas fontes a intención da compañía é que acaben quedando só 4 ou 5. Por ese motivo, ofrecería os contratos a empresas de maior tamaño, capaces dunha maior concentración de tarefa e con presenza en Bolsa.
O traspaso comunicado o pasado mércores afecta, ademais da Lugo, ao mantemento de redes de Barcelona, A Coruña, Ourense, Pontevedra e Cantabria. Desa tarefa neses puntos farase cargo Comfica a partir do 30 de outubro, que é a data efectiva do traspaso.
Por outra banda, Liteyca anunciou o pasado luns o traspaso tamén dos mesmos contratos para Telefónica en Madrid, León, Ávila, Salamanca, Zamora e As Palmas. Nese caso, son asumidos por Ezentis, a través da súa filial Excellence Field Factory e supoñen un importe total de 27,5 millóns de euros.
Liteyca mantén por agora os contratos con Telefónica noutro terzo das provincias onde opera, pero se espera que tamén traspase eses a unha terceira empresa e que o comunique nos próximos días. De calquera modo, estímase que o fará antes do 30 de outubro, data oficial dos traspasos.
