A empresa pública Tragsa, nun comunicado que fixo público para "desmentir" a denuncia realizada polo sindicato CSIF, asegura que os veterinarios da campaña de saneamento gandeiro que se incorporaron o pasado luns aos seus postos de traballo en Galicia "contaron con todos os medios necesarios de protección".
Tragsa sinala que o plan de actuación que elaborou é conforme ao procedemento establecido polo Ministerio de Traballo, xunto co Instituto Nacional de Seguridade e Saúde no Traballo.
Esta empresa considera que a actividade do saneamento ten "baixa probabilidade de exposición" debido a que "non se mantén un contacto estreito cunha persoa confirmada de coronavirus, como pode ser o persoal sanitario, ou contacto incluso cun caso probable de coronavirus".