O tráfico xa volve circular polo tramo da Ronda da Muralla entre as rúas Santiago e Vilalba, onde se interveu para ensanchar as beirarrúas e deixar un só carril de circulación.
O responsable de mobilidade, o tenente de alcalde Rubén Arroxo, celebrou que os lucenses contan cunha nova zona de paseo xunto ao monumento e que avanza a "humanización da cidade".
A reapertura da vía permitirá dar axilidade ao tráfico, sostén o departamento de mobilidade, que recordou que os coches que circulen pola Ronda terán prioridade respecto dos que cheguen pola rúa Santiago, onde o tráfico pasará a estar regulado por un ceda o paso. Esa medida, xunto á circulación en sentido subida por Cidade de Viveiro e Pascual Veiga, permitirá crear itinerarios máis rápidos para chegar á zona de Ramón Ferreiro, sostivo Arroxo.
A intervención, sostén o tenente de alcalde, tamén permite mellorar a muralla, xa que a previsión é reducir vibracións xunto ao monumento, o que encaixa coas recomendacións de Icomos, remarcou.
