O tráfico de Lugo volveu vivir este martes un novo proceso de axuste co inicio das obras do tramo da Rolda vai de Pórtaa de Santiago á rúa Vilalba, no que vaise a ensanchar a beirarrúa, deixando un só carril para o paso de vehículos.
Os traballos supoñen o cambio de dirección das rúas Cidade de Viveiro e Pascual Veiga, que finalmente non se activou ata este martes. Na primeira xornada de reordenación do tráfico houbo algúns momentos de confusión entre os condutores e retencións puntuais na zona do Parque.
O axuste na circulación supón a supresión de aparcadoiros en Cidade de Viveiro e Pascual Veiga, e ademais afecta a outras vías da contorna. Así, a circulación pola rúa Puro Cora limitouse a residentes e persoas autorizadas, e a rúa Vilalba converteuse en bidireccional, para permitir o acceso dos residentes aos garaxes.
O cambio nesa rúa foi dos que máis confusión xerou entre os condutores, moitos dos cales aínda se mostran ás veces confundidos pola reordenación recente da confluencia entre esa vía, Anxel López Pérez e Ramón Ferreiro.
Os cambios introducidos agora terán, en principio, carácter temporal e prolongaranse durante o tempo que duren as obras na Rolda. A obxectivo da área de mobilidade é axilizar os traballos e que se poidan executar durante os meses de xullo e agosto, o de menos tráfico do ano en Lugo.
O tenente de alcalde, Rubén Arroxo, recordou este martes que o obxectivo é gañar espazo peonil na Rolda. Actúase, recordou, nun tramo no que os coches circulaban moi pegados á muralla e no que en 2020 xa se cortou temporalmente un carril.
Trátase de dar un paso máis cara á humanización da muralla, dixo Arroxo, que recordou que se trata dunha zona singular do monumento, na que conflúen os tres Patrimonios da Humanidade que ten a cidade: a muralla, a catedral e o Camiño Primitivo.
Agora óptase por ampliar a beirarrúa, deixando para a circulación de vehículos un carril, pero o proxecto permitirá ir máis aló no futuro e peonalizar completamente ese tramo da Rolda, abundou o tenente de alcalde de Lugo. A obra en marcha neste momento levará axustes na regulación semafórica da zona. Os coches que vaian pola Rolda terán prioridade e iso dará axilidade á circulación, dixo.
A intervención entre Pórtaa de Santiago e a rúa Vilalba é a segunda na Rolda, onde está en marcha o proxecto para peonalizar A Mosqueira.
