O subsector de Tráfico de Lugo realizará de forma preventiva e aleatoria controis de alcol e drogas no marco da festividade de San Xoán, que terá lugar na noite deste martes 23 de xuño.
O obxecto que se persegue con estas probas de detección de alcol e drogas, segundo o Instituto Armado, "é evitar que as persoas que consuman estas substancias se poñan ao volante dos vehículos e poñan en risco, non só a súa integridade física, senón a do resto de usuarios da vía".
Estes controis realizaranse de xeito aleatorio, tanto en forma de "macro-control" como en "controis exprés", segundo precisaron as mesmas fontes, que indicaron que variarán "constantemente de localización", para o que se establecerán tanto en vías principais como naqueloutras secundarias e pistas locais da rede viaria provincial.
