A ordenación do tráfico rodado na cidade non sempre contenta a todos e por iso a miúdo xorden propostas para que se modifique ou queixas polos cambios realizados polo Concello. Así, dous colectivos veciñais acaban de expor que se revise a sinalización en dúas rúas de Recatelo e Garabolos, mentres que na Rolda das Fontiñas xurdiron queixas de residentes pola decisión do Concello de eliminar varias prazas de aparcadoiro para facilitar o xiro aos autobuses que realizan o transporte escolar do IES Sanxillao.
En cambio, a Federación de Asociacións de Veciños de Lugo o que pide para Recatelo é precisamente o contrario, que se peonalice a rúa Isaac Díaz Pardo para evitar a habitual imaxe de coches aparcados sobre a beirarrúa desta vía, cuxa estreita calzada dificulta o paso de vehículos.
"Este feito impide notablemente a circulación rodada, con perigo de accidente tanto de vehículos como das persoas que precisan ir polas beirarrúas que, en ocasións, atopan estas totalmente ocupadas por vehículos", explican desde o colectivo veciñal que, tras pedir que se solucione esta situación, conclúe que "a mellor forma de eliminar este problema para vos viandantes e as persoas que acceden aos seus fogares é que se peonalice a rúa Isaac Díaz", Ademais, explican que trasladarán un escrito dirixido ao concelleiro de mobilidade expóndolle todas estas inquietudes.
ANGELO COLOCCI. Pero este non é o único colectivo veciñal que pretende conseguir cambios na ordenación do tráfico porque a asociación Alto de Garabolos acaba de presentarlle ao mesmo concelleiro outro escrito no que se dá conta dos problemas de acceso que rexistra a Rúa Angelo Colocci desde a Avenida da Coruña.
"Esta rúa de dobre dirección e dobre carril ten un acceso totalmente disparatado, xa que para acceder a ela dende o centro da cidade, en dirección saída de Lugo pola Avenida da Coruña, os condutores teñen que dar unha volta pola rotonda sita no alto de Garabolos", explican desde a asociación. Engaden que esta situación "ten moi desgustados a todos os veciños que ven como perden tempo e cartos en dar unha volta que non ten xeito ningún".
Por iso, propoñen que se coloque un semáforo que permita dar paso cara a Angelo Colocci a todos os vehículos que circulen pola Avenida da Coruña ou que se constrúa unha rotonda.
