O Ministerio de Traballo aprobou a cesión do edificio da antiga Escola de Enfermería de Lugo á Xunta para instalar alí a nova oficina de emprego da cidade, que agrupará os servizos que ata agora se ofrecen en Acea de Olga e barrio Feixoo.
A obra de adecuación do novo inmoble -ata hai pouco o chamado edificio administrativo da Residencia, que acollía a unidade de saúde mental- contará coa achega por parte do Goberno estatal de 1.227.200 euros.
Segundo informou este luns a delegada do Goberno en Lugo, Isabel Rodríguez, a cesión do edificio, que é propiedade da Tesourería Xeral da Seguridade Social, farase gratuitamente e por un prazo de 20 anos, que será prorrogable por ambas as partes.
Tamén explicou que a resolución xa lle foi comunicada á Xunta e que será efectiva axiña que como as dúas administracións asinen o preceptivo convenio. Por outra banda, recordou que a Tesourería Xeral da Seguridade Social, propietaria de todos os terreos ocupados polo antigo complexo do hospital Xeral, xa autorizou en xullo a ocupación temporal da antiga Escola de Enfermería co obxectivo de facilitar o comezo das obras antes que se producise a cesión de forma formal.
O edificio xa fora cedido á Xunta para ser usado polo Sergas, pero como o uso pasa agora de sanitario a social tivo que facerse unha retrocesión e, de novo, é cedido polo Goberno estatal ao autonómico para acoller as súas novas funcións.
