O presidente da Deputación de Lugo, José Tomé, acusou á Xunta de Galicia de manter a sanidade pública, en concreto nas zonas rurais da provincia, nunha "situación dramática", porque nos últimos anos perdeu servizos públicos, ata o punto de que determinados centros de saúde quedan "pechados" cando un médico ten que saír a consultar a domicilio.
Tomé fixo estas declaracións antes do pleno ordinario da Deputación de Lugo, onde o goberno provincial presentou unha moción en defensa da sanidade de pública porque "a Xunta non está a responder como debería" e "hai 1.100 profesionais sanitarios menos" desde que comezou "a gobernar Feijóo", a pesar de que a poboación "está máis envellecida" e, polo tanto, as necesidades son maiores, segundo o texto.
"A Xunta está a facer xustamente o que dixo e o que prometeu. Dixo que ía ser a lexislatura do rural. Está a ser a lexislatura do total abandono do rural, que perde servizos públicos e privados", dixo Tomé, mentres que o goberno autonómico "non fai nada para remediar esta situación".
De feito, segundo Tomé, "en moitos municipios están a quedarse sen médicos. En comarcas, sen pediatras. Os centros de saúde quedan pechados. Os médicos teñen que saír a domicilio e non queda ninguén neles. A situación é dramática no rural en relación coa sanidade e os servizos públicos".
Por iso, pediulle á Xunta "que se poña as pilas" e que "non vexa a sanidade como un negocio", senón como un
Segundo Tomé, se as empresas privadas non visen "rendibilidade" non investirían en Lugo e "se a ven, é que non hai unha boa cobertura", interpretou.
"Se houbese suficiente cobertura pública non habería un espazo tan grande para a privada", asegurou.
