Aínda que recordou que a competencia para modificar as candidaturas pertence á Comisión Federal de Listas, o presidente da Deputación de Lugo, José Tomé, negou que o desprazamento de Sonsoles López Izquierdo -que foi elixida deputada nos anteriores xenerais como número 2- na lista para os comicios do 10 de novembro se deba "a ningún tipo de castigo".
O posto que ocupou nos anteriores comicios Sonsoles López Izquierdo será agora para Javier Cerqueiro. "A Comisión Federal de Listas, que é o órgano competente para este tipo de cousas, decidiu mover un pouquiño a lista. É unha competencia dos órganos federais do partido e, polo tanto, nós o que facemos é respectar esa decisión", explicou.
Tomé quixo quitarlle ferro a esta decisión e aínda que a de Lugo foi a única lista que se moveu en Galicia, recordou que "en España houbo máis listas que tamén se retocaron".
O presidente da Deputación negou, en calquera caso, que a substitución en posto de saída de Sonsoles López Izquierdo, deputada provincial e colaboradora próxima de Darío Campos na institución provincial no anterior mandato, se deba "a ningún tipo de castigo". "En absoluto", engadiu, de feito "permanece na lista".
"En todo caso, eu non debo facer ese tipo de valoracións, quen debe facelas é o órgano competente, que é a Comisión Federal de Listas", matizou.
