O campus Terra da USC continúa como unha referencia no ámbito da formación agroalimentaria. Dúas titulacións que se imparten en Lugo, como o grao de Enxeñaría Agrícola e Agroalimentaria e o máster en Enxeñaría Agronómica, recibiron este xoves o selo de calidade Eur-Ace.
O reitor da universidade, Antonio López e o coordinador do máster en Enxeñaría Agronómica, Santiago Pereira, recolleron este galardón en forma de diploma no acto de entrega, celebrado na sede da Axencia Nacional de Avaliación de Calidade e Acreditación, en Madrid.
PRESTIXIO. O selo Eur-Ace outorga prestixio e valor internacional a programas como o da USC, que cumpre cos estándares do Espazo Europeo de Educación Superior. Precisamente por este motivo, está considerado como distinción máis prestixiosa que un título habilitante desta rama pode recibir en toda Europa.
Este recoñecemento implica que a Escola Politécnica Superior de Enxeñaría do campus de Lugo convértese no primeiro e único centro universitario do territorio galego que consegue esta acreditación para todas as titulacións habilitantes que imparte.