A Xunta de Galicia acordou coa Asociación Provincial de Empresarios de Hostalería de Lugo (Apeh) os usos do futuro proxecto que converterá casa-torre do barrio lucense da Tinería nun espazo referente para a promoción do turismo e a gastronomía da provincia coa vista posta no Xacobeo 21.
O inmoble será rehabilitado polo Instituto Galego de Vivenda e Solo, dentro do Programa Rexurbe, unha iniciativa de rehabilitación posta en marcha pola Xunta no ano 2018, co fin recuperar os centros históricos das diferentes vilas e cidades galegas. Así, no próximo ano, programa Rexurbe en Lugo destinará 780.000 euros para intervir, entre outras actuacións, no acondicionamento do edificio do Pazo de Dona Urraca e a casatorre da Tinería.
O acordo selouse coa firma dun protocolo entre o conselleiro de Cultura e Turismo, Román Rodríguez, e o presidente dos hostaleiros lucenses, Cheché Real, polo que se destinará este espazo á potenciación e difusión dos camiños de Santiago que atravesan este territorio, "así como á posta en marcha de accións que redunden na mellora e profesionalización do sector desde o punto de vista turístico e enogastronómico", segundo informou a Xunta. Tamén se promocionarán os Camiños a Santiago.
Cultura detallou que o inmoble, conformado por dúas edificacións anexas á muralla de Lugo, será rehabilitado polo IGVS "co fin de realizar actividades que teñan como obxectivo o desenvolvemento do potencial cultural e turístico de Lugo e a mellora da atención dos peregrinos e as persoas interesadas nos camiños de Santiago nesta provincia". Ademais, a Apeh instalará alí as súas dependencias administrativas.