Os terreos do vello hospital Xeral de Lugo estarán libres en outubro para que se poida construír unha residencia para maiores con 120 prazas. Así o anunciou este martes o presidente da Xunta, Alberto Núñez Feijóo, quen asistiu ao comezo dos traballos de demolición deste centro sanitario, que durarán dous ou tres meses. O xefe do Executivo galego dixo que a principios de 2020 poderanse licitar as obras do xeriátrico.
O derrubamento levarano a cabo dous guindastres con brazos duns 40 metros de longo con cizallas xigantes e robots teledirixidos.
Núñez Feijóo tamén anunciou que o Diario Oficial de Galicia publicará este mércores a licitación das obras do centro integral de saúde, o primeiro deste tipo de Galicia, que se situará no antigo Materno-Infantil.
Este inmoble de seis plantas rehabilitarase para acoller un centro de saúde, un PAC, unha base do 061 e unha área de saúde mental. O seu orzamento ascende a 12 millóns de euros.
Nesta parcela tamén se construirá un centro de emprendemento, unha oficina de emprego e unha central de biomasa. Ademais, ofrecerase unha parcela ao Ministerio do Interior para que constrúa unha comisaría da Policía Nacional. Feijóo afirmou que así se vai a construír un novo barrio do século XXI".
