Os axentes da Brigada Provincial de Policía Científica da Comisaría Provincial de Lugo que se fixeron cargo do caso e os catro investigadores chegados desde Madrid deron por finalizado "o traballo de campo" para determinar a orixe do incendio que o 11 de abril calcinou tres naves e afectou outras tantas no polígono industrial do Ceao.
Segundo a información facilitada a Efe pola comisaría provincial, os axentes que participaron na investigación, na que se solicitou incluso a colaboración de guías caninos para detectar a posible presenza de "acelerantes" realizaron "o percorrido inverso ao que fixo o lume" para chegar á orixe do mesmo.
Para completar a investigación, ademais da inspección ocular, "recolleron todo tipo de indicios" que agora serán analizados en diversos laboratorios do Corpo Nacional de Policía para chegar a unha conclusión. Posteriormente, ese informe elaborado pola Científica será remitido á Policía Xudicial, que se ocupará do seu traslado ao xulgado.
O dispositivo de urxencias despregado para controlar a zona afectada polo lume, precisamente para evitar que as chamas se reavivasen e garantir a seguridade, quedou desactivado o pasado venres 23 de abril, doce días despois do voraz incendio.
