As Termas prepara para os días 17, 18 e 19 unha gran cita de reinauguración do centro comercial, tras a profunda renovación levada a cabo no último ano.
O centro comercial prepara para os días 18 e 19 concertos, espectáculos, animación, xogos e actividades para todos os públicos. O venres 18, ás 20.30 h terá lugar a actuación de Sabela Ramil, a finalista galega de Operación Triunfo 2018, e o sábado 19, ás 19.00 horas, será a quenda da banda de rock Furious Monkey House, formada por adolescentes galegos de entre 15 e 16 anos e considerada unha das grandes promesas da música española dos últimos anos.
O centro comercial dedicou dous millóns á reforma de instalacións e prevé reforzarse ofrecendo máis actividades aos clientes
Os actos programados polo centro arrincarán o día 17, cun acto institucional que contará coa presenza dos principais representantes de operadores do Centro Comercial, así como autoridades políticas, empresariais e sociais de Lugo.
O centro, tras as reformas levadas a cabo, relánzase coa lema Ser máis, ter máis e sinala que "propón un novo concepto de espazo comercial e marcar o inicio dunha nova forma de consumo, ofrecendo outro tipo de actividades para todos os públicos".
Sinala que un exemplo desa nova dinámica "é a posta en marcha do club Hola Familia VIP", dirixido a embarazadas e familias con fillos de ata tres anos, que ofrece talleres e clases de interese para os seus socios, ademais de descontos en numerosos locais da área comercial.
O evento de reinauguración persegue "mostrar a imaxe renovada do centro comercial", no que Lar España Real Estate Socimi investiu dous millóns de euros para as obras de reforma das súas instalacións. Froito desta reforma, redeseñáronse os baños e a sala de lactación, algo que foi valorado de forma moi favorable polos clientes, sinala o centro. Tamén se reformou a zona de restauración e engadíronse zonas de descanso e elementos de vexetación, nunha clara aposta polo deseño sostible.
Ademais, durante os últimos meses As Termas acolleu un total de sete novas aperturas, ás que se sumarán dúas novas proximamente: KFC, a cadea de comida rápida especializada en pito, e Loops&Coffee, unha franquía cuxo produto estrela son as rosquillas e unha ampla gama de cafés. Tamén cabe destacar a reapertura dos cines de man de Yelmo Cines, que volveron abrir as súas portas en agosto, xerando gran expectación e interese entre o público lucense.
O centro comercial lucense, propiedade de Lar España Real Estate Socimi, é xestionado por Grupo Lar a través de Gentalia.
