Volta ao cole para máis de 20.000 alumnos na provincia

Chegou o día para 20.316 alumnos de infantil, primaria e educación especial. Todos collerán este mércores a mochila logo de case tres meses de vacacións e iniciarán un novo curso lectivo marcado pola consolidación do libro dixital en case a metade dos centros educativos da provincia e polas obras de reforma integral en oito colexios e institutos.

As obras só están completamente finalizadas no Ceip Luís Pimentel. No resto de centros, os traballos seguirán nas primeiras semanas de curso lectivo.

Ese atraso nas obras provocou o malestar entre pais e profesores en colexios como o de Cervo ou o de Casás, na capital, que visitou este martes a conselleira de Educación, Carmen Pomar.

A conselleira lanzou unha mensaxe de tranquilidade ás familias e aos equipos docentes ante o inicio do curso e asegurou que as obras pendentes desenvolveranse, en todos os casos, fóra do horario escolar.

Ademais, Pomar defendeu que as obras no colexio de Casás, nas que a Consellería de Educación inviste 732.571 euros, suporán unha mellora das condicións do centro escolar.

O plan de reforma contempla medidas de mellora da eficiencia enerxética, co illamento de tellado e fachada e a colocación de fiestras de aluminio con rotura de ponte térmica. Aforrarase un 68,6% no consumo de enerxía primaria e un 73,5% nas emisións de CO2. 

Pomar di que as obras se farán fóra do horario lectivo e as anpas instan a non ir a clase

A rehabilitación do colexio leva tamén a adaptación do centro a novas necesidades e a mellora de instalacións. Así, no primeiro dos bloques do colexio refórmanse os aseos de profesores, colócase pavimento de linóleo en aulas de infantil e redistribúese a antiga vivenda do conserxe para albergar, entre outras cousas, un local para a Anpa.

No bloque dous do edificio, reformarase o aseo e mellorarase a aula de música, entre outras melloras. No tres, os vestiarios reconverteranse en aseos, incluíndo un accesible. No bloque catro tamén se actuará nos servizos.

Paralelamente, Carmen Pomar animou ao centro a continuar implicándose no desenvolvemento de programas educativos innovadores, como o de introdución á robótica educativa.

Recordou que o ano pasado o centro desenvolveu tamén a primeira liña dos contratos-programa, de reforzo, orientación e apoio (Proa), que busca mellorar as perspectivas escolares do alumnado a través do traballo organizado para a adquisición de destrezas básicas. O centro participa tamén no Plan de Mellora de Bibliotecas Escolares.

A pesar das explicacións da conselleira, os representantes dos pais do colexio de Casás instaron as familias a non levar aos seus fillos a clase "polo menos durante esta semana" porque as obras realizáronse "cunha total e absoluta falta de previsión". Segundo a Anpa de Casás, "o que a conselleira considera pequenos remates implica que os nosos fillos comecen o curso con bloques de aulas pechados e localizacións provisionais".

Os profesores de Casás tamén se queixaron á conselleira das consecuencias do atraso das obras e aseguraron este martes que non puideron organizar adecuadamente o arranque do curso porque moitas aulas non están acondicionadas. A directora, Verónica Eiravella, explicou que os profesores "non tiveron tempo para preparar o material nin ler os expedientes" polos inconvenientes que supoñen as obras.

Na capital, si está todo listo no Luís Pimentel. "Está todo en perfecto funcionamento e as aulas preparadas", asegurou a directora, Teresa Trigo.

PROVINCIA. No colexio Santa María da Fonsagrada, pola súa banda, o curso poderá arrincar con normalidade, aínda que a súa directora, Concepción Eiras, cre que o centro non estará listo "antes dun mes". Unha situación parecida á que se vive no CPI Ramón Piñeiro de Láncara, onde o seu responsable, Carlos Carballo, asegura que as obras "están ao 80 por cento".

Na Mariña, só o Virxe do Carme de Burela arrincará con normalidade. As obras no Ceip Número 1 de Foz e no Ceip de Cervo serán a imaxe habitual durante as primeiras semanas do curso. En Cervo, de feito, os pais aseguraron que non levarán este mércores aos nenos a clase e en Foz dixeron que só os deixarán entrar se comproban que o colexio reúne condicións.