LUGO. A Asociación Provincial do Taxi de Lugo acaba de presentar no Concello unha proposta para revisar as tarifas deste servizo público a partir do próximo ano, as cales non se actualizan desde febreiro de 2013. En base a un informe ecónomico de gastos e ingresos, os autopatronos lucenses propoñen unha subida da tarifa diúrna que rolda o 8% a cambio de baixar un 5% a nocturna, que segundo o estudo que presentan supón o 20% do total de servizos que se realizan.
Segundo esta proposta, o quilómetro percorrido de día subiría 8 céntimos e quedaría en 1,05 euros (1,09 o non laborables), mentres que de noite baixaría 7 céntimos, ata os 1,32 euros. Ademais, exponse modificar o horario nocturno, que agora rexe de 0.00 a 7.00 horas, ampliándoo 60 minutos e iniciándoo ás 22.00 e ata as 6.00 horas.
A baixada de bandeira tamén subiría dous céntimos ata chegar a 1,90 euros durante o día, en xornadas laborables, e tres céntimos, ata os 2,50, os fins de semana e festivos, mentres que seguiría sendo de 2,55 de noite.
A rebaixa na tarifa nocturna non sería a única compensación que propoñen os taxistas para compensar ao aumento da diúrna, xa que ademais expoñen ao Concello fixar un tope máximo do que se cobra ata chegar a recoller ao cliente que solicitou o servizo por teléfono a través do Radio-taxi. Neses casos, o taxímetro non poderá contabilizar máis 3,75 euros de día e 4,80 de noite no momento de recoller ao pasaxeiro dentro da zona urbana. «Entendemos que esta é unha reforma necesaria que sempre beneficia ao cliente e contribúe á unificación de criterios entre os taxis», explica a asociación.
Así mesmo, o colectivo propón eliminar o suplemento de 0,56 euros que se cobra por saír desde a estación de buses ou a de tren, ao entender que estas paradas as usan todo tipo de clientes e porque cren xa hai un suplemento de equipaxe para os viaxeiros que proceden desas estacións, o cal si propoñen manter, aínda que rebaixando un céntimo a tarifa ata os 0,55 euros.
Finalmente, os taxistas propoñen unha redución de case dous euros na hora de espera nocturna, que pasaría a ser de 25 euros, mentres que esa tarifa de día manteríase en 19,71 euros.
CAMBIO LEGAL. A petición dos taxistas foi rexistrada onte nunha xornada na que os directivos da asociación reuníronse con representantes de grupos municipais para solicitar o seu apoio.
O escrito, dirixido á alcaldesa, expón que as tarifas non se revisan desde hai case seis anos, «a pesar de que os custos derivados da explotación do servizo aumentaron», á vez que se indica que nestes anos entrou en vigor en Galicia unha nova lei de transporte que afecta o sector do taxi que fai necesario a adaptación tarifaria «á nova realidade normativa e á práctica existente noutros concellos. Así, ponse como exemplo poboacións como Viveiro, Sarria, Monforte e Vilalba, onde se asegura que se aprobaron tarifas «xa baixo a licenza da citada lei».
