A comisión de reclamacións e suxestións do Concello de Lugo é unha caixa de correos no que caben todo tipo de propostas, desde as habituais queixas cidadás polo mellorable funcionamento de servizos como o transporte público ou pola acumulación de trimestres no recibo da auga ata outras que poden xerar que se esboce un sorriso.
É o caso dun cidadán que solicitou ao Concello de Lugo que coloque nas rúas colectores de menor tamaño para que as persoas baixas lles resulte máis accesible depositar o lixo.
O servizo municipal de medio ambiente respondeulle ao usuario que "non é posible cambiar o colector por outro máis pequeno porque a súa capacidade é necesaria para recoller todos os residuos da zona".
O que si fixo o persoal de mantemento da adxudicataria do servizo foi substituír os cables do sistema de apertura do colector de residuos orgánicos que se atopa próximo ao domicilio deste usuario porque a tapa estaba "recia" para abrila.
Un veciño da Avenida de Madrid, por outra banda, solicitou ao Concello que cambie de localización os colectores que están cerca do cruzamento coa Ronda das Mercedes polo "perigo" que entrañan para a seguridade viaria.
O cidadán aduce ademais "insalubridade e falta de hixiene" destes colectores que, ao seu xuízo, supoñen "un grave prexuízo económico" para os establecementos da zona, polo que propón que se recoloquen preto da sede da Seguridade Social. O Concello aínda non lle respondeu.
VAOS. Outro cidadán, que verteu as súas queixas na comisión de reclamacións e suxestións, leva case 14 meses esperando a que o Concello de Lugo cambie o titular do vao dun baixo na Rúa Quiroga, que era do seu pai, debido a que faleceu. A pesar de que, segundo asegura, acudiu desde maio do ano pasado catro veces ás dependencias municipais aínda non atenderon a súa solicitude. Hai uns días chamárono para dicirlle que non atopaban a documentación presentada, o que o afectado considera unha desconsideración.
