Unha talla de piñeiros na parroquia de Adai deixou ao descubertos novos petróglifos nas Penas do Caldeiro, segundo anunciaron Brais Rodríguez Romeu e Xabier Moure, do colectivo Patrimonio dos Ancares.
Os achados apareceron nunhas rocas situadas a 541 metros de altura sobre o nivel do mar e son de diverso tipo. Así, na parte superior das rocas graníticas localizáronse máis dunha decena de coviñas ou cazoletas, unha combinación de dous círculos concéntricos, unha incisión navicular, unha cruz inscrita dentro dun círculo e tamén un cruciforme.
En dous ocos situados debaixo das rocas, o colectivo Patrimonio dos Ancares documentou outras dúas pezas con cazoletas.
O nome de Penas do Caldeiro, co que se identifica esta formación granítica, quizais se deba a que na parte superior contén unha ampla e profunda pila.
O lugar atópase nunha zona arqueolóxica de primeira orde xa que nas proximidades, nun radio duns 400 metros, atópanse o dolmen de Adai, varias mámoas, o asentamento do Castrillón, os petróglifos da Pena do Castrillón e da Pena Fita e un menhir que Patrimonio dos Ancares pon en dúbida.
Pero o elemento máis enigmático deste conxunto é unha impresionante pedra de forma elíptica, única en Galicia segundo o colectivo de investigadores, duns 12 por 6 metros, descuberta hai tres décadas. Esta pedra está circundada por dezaoito buracos comunicados todos eles por un asuco. Na parte central, vese unha pila circular duns 25 centímetros de diámetro que desagua noutra rectangular de 80 por 30. Ademais, hai varias cazoletas.
Aínda que algúns estudos apuntan a que esta pedra puido ser a base dunha cabana de tipo ritual, Patrimonio dos Ancares afirma que aínda hoxe esta pedra é toda unha incógnita arqueolóxica, polo que reivindica que o Concello promova investigacións sobre esta pedra.
