A ribeira do río Miño entre a escola de piragüismo e a potabilizadora cambia estes días a súa imaxe frondosa por unha de ribeira máis aberta por mor da talla duns 40 árbores mortas ou en estado decrépito que está a acometer a Confederación Hidrográfica do Miño-Sil.
Os traballos, que afectan a un tramo de 500 metros de ribeira, prevén a retirada duns 40 metros cúbicos de madeira da canle. Trátase, segundo fontes da Confederación, duns 40 árbores dos que 37 deles son alisos, unha especie que está afectada pola praga Phytoptora alni, o fungo que provocou a morte de centos de árbores nos últimos anos e que xerou consecuencias ambientais e danos en infraestruturas.
A praga apareceu a comezos desta década e, ata agora, realizáronse fundamentalmente actuacións preventivas como a curta de árbores que acomete estes días a Confederación. Esa acción supuxo en moitos puntos un cambio radical das paisaxes ribeiregas, perfectamente apreciable na capital nos últimos anos.
A diferenza doutras actuacións, o ente que xestiona o Miño nesta ocasión optou por facer un talla importante, algo que se asegura que levaba tempo sen executarse. Para iso procedeuse a realizar unha contratación a maiores de efectivos para acometer os traballos de retirada da madeira con diferentes medios e utilizando incluso lanchas a motor para arrastrar troncos e ramas dunha beira a outra do río nunha zona de difícil acceso para a maquinaria forestal.
Nos labores, primeiro realízanse as tallas daqueles exemplares que están rotos ou con risco de caer, para logo arrastrar a madeira desde a marxe esquerda cara á dereita, nun tramo de aproximadamente 300 metros. Na marxe esquerda nun tramo de 170 metros, debaixo da ponte da N-640, os arrastres realízanse mediante cableado desde a mesma beira, á que acceden os operarios utilizando unha leira particular.
Para a execución dos traballos, que se realizarán ata o próximo 1 de xullo e entre as 8.00 e as 14.00 horas, mobilízanse a dúas brigadas compostas por 3 operarios cada unha e 2 operarios máis que se ocupan do manexo de senllos tractores con cabrestante, ademais do persoal técnico que supervisará as medidas de seguridade. Pola complexidade dos traballos, acoutouse unha zona de 487 metros na que se prohibirá toda práctica de actividades acuáticas.
