A subdelegada do Goberno en Lugo, Isabel Rodríguez, recoñeceu que o novo Executivo terá que ver "como están os trámites" para construír a nova Comisaría Provincial do Corpo Nacional de Policía en Lugo, cuxa construción estaba prevista en terreos do antigo hospital, para tomar decisións en relación con esta dotación.
A subdelegada do Goberno fixo estas declaracións antes da súa presentación oficial, que terá lugar esta tarde na sede da Subdelegación, na Praza de Armanyá, en presenza das autoridades locais e de representantes da sociedade civil.
Isabel Rodríguez dixo a Efe que se trata dun "tema" que haberá que "estudar máis a fondo" para fixar unha postura por parte do novo executivo, porque máis aló dos anuncios realizados polo anterior Goberno e das declaracións políticas, hai que ver "como" están realmente "os trámites" para construír a nova Comisaría Provincial.
A nova subdelegada, que tomou posesión do cargo hai semanas, xa mantivo entrevistas coa alcaldesa de Lugo, Lara Méndez; o presidente da Deputación Provincial, Darío Campos; e o delegado territorial da Xunta de Galicia, José Manuel Balseiro, ademais de visitar a Comandancia da Garda Civil e a Comisaría Provincial para unha primeira toma de contacto cos seus respectivos mandos.
Recoñeceu, logo dese primeiro encontro cos mandos, que a principal carencia do Corpo Nacional de Policía (CNP) na provincia ten que ver coa "falta de persoal" nas comisarías de Lugo, Viveiro e Monforte de Lemos.
En todo caso, quixo destacar que, logo de anos sen recibir novos axentes, acaban de incorporarse once policías en prácticas que "van reforzar o persoal en Lugo", algo que vai ser moi importante para a seguridade", ademais darlle "máis visibilidade á Policía Nacional" na rúa.
Tamén se mostrou moi ilusionada pola posibilidade de facer chegar á cidadanía de Lugo as políticas do novo Goberno, que preside Pedro Sánchez, sen esquecer que as súas "prioridades" son a "seguridade cidadá" e a "loita contra a violencia de xénero".
