Axentes da Policía Local de Lugo retiveron a un menor que furtou comida en varios supermercados da capital en compañía doutros dous nenos.
Unha patrulla da Unidade Territorial de Policía de Barrio mobilizouse sobre as cinco e media da tarde do luns despois de que o responsable dun supermercado da Rúa Xosé Novo Freire chamase á Sala do 092 para comunicar que tiña retido ao presunto autor dun furto. Unha vez alí, o persoal do establecemento explicou que, momentos antes, o mozo retido, de 14 anos de idade, entrara no supermercado en compañía dun neno de 8 anos e doutro mozo un pouco maior e intentara levar produtos da tenda.
Segundo explicaron, o menor escondeu os artigos nun carro de bebé, pero pouco despois, dous deles fuxiron, deixando no lugar o carriño e ao autor dos feitos.
O menor retido recoñeceu ante os axentes que era certo que intentara levar varios produtos da tenda e os axentes descubriron no interior do carriño de bebé varias botellas de aceite, queixos, carne e bolsas de fiambre. Ademais, no fondo do carriño había unha bolsa de cor azul que contiña 24 paquetes de xamón e un queixo.
O persoal deste establecemento explicou que os artigos que había no interior da bolsa non eran dese supermercado, polo que os policías percorreron as tendas da zona e nunha de Ramón Ferreiro detectan que os estantes desa mercancía estaban baleiros.
Os policías procederon ao visionado das cámaras de seguridade e observaron aos mozos furtando a mercancía e introducíndoa no carriño de bebé. Por iso, os axentes abriron dilixencias por un delito de furto, sendo o valor da mercancía subtraída de 201 euros.
