Os casos activos de coronavirus seguen aumentando na provincia de Lugo, aínda que a ritmo lento. Segundo os datos ofrecidos este venres polo Sergas o número de infeccións activas sitúase en 54 –catro máis que o día anterior– tras detectarse seis novos casos e superar a enfermidade dúas persoas nas últimas horas.
A presión hospitalaria non sofre variacións: hai tres pacientes con covid-19 ingresados, todos no Hula, dos que dous están en planta e un na Uci.
Desde o inicio da pandemia superaron a enfermidade na provincia 19.723 persoas. Faleceron 262, aínda que o Sergas notifica 254 ao non contabilizar a algúns pacientes lucenses falecidos noutras áreas sanitarias.
GALICIA. O aumento de casos e de contaxios polo covid-19 en Galicia continúa unha xornada máis –logo de alcanzar este xoves un máximo de 48 e 77, respectivamente– con 84 contaxios máis e 59 persoas máis con infección activa, ata chegar ás 640.
Destes novos casos, a maioría concéntranse en Ourense, con 24 máis, debido aos brotes asociados a dúas excursións de maiores de 65 anos realizadas a Benidorm polo que a área sanitaria xa se sitúa por encima da da Coruña, con 162 casos fronte a 157, que ata este xoves lideraba esta clasificación.
Mentres, a presión hospitalaria segue case estabilizada, con 32 pacientes, tras dúas persoas menos ingresadas en planta, 26, mentres que permanecen 6 na UCI, segundo os datos do Servizo Galego de Saúde (Sergas) deste xoves 4 de novembro, ás 18 horas.
Desde o inicio da pandemia en Galicia contaxiáronse 183.483 persoas e curáronse 180.224, das que 25 corresponden á última xornada, na que non se notificou ningunha morte pola covid-19, así que a cifra de falecidos continúa en 2.653.
A incidencia acumulada mantén unha tendencia crecente na comunidade, con 21,50 casos por cen mil habitantes a 14 días, dous puntos máis que o mércores, aínda que Galicia segue en situación de nova normalidade e moi lonxe da media española, de 51,61 casos a 14 días.
Segundo os datos facilitados este xoves polo Ministerio de Sanidade, a positividad das probas diagnósticas sitúase no 1,49 % en Galicia, fronte ao 2,76 % estatal.
Por áreas sanitarias, é Ourense, con 162, a que ten un maior número de casos activos, tras os 24 rexistrados onte; seguida da Coruña, con 157, o que supón seis máis.
A área de Vigo ten 91 casos (+10); mentres que Pontevedra ten 63 (+8); Santiago 59 (+4); e Lugo e Ferrol teñen 54 cada unha, catro máis en ambos os casos.
En Galicia administráronse 4.512.540 dose de vacina contra a covid-19 e xa hai 2.294.825 persoas coa pauta completa.
