O confinamento derivado da epidemia de coronavirus está a cambiar moitos dos nosos hábitos diarios. Un deles é o da compra de alimentos. A nova situación restrinxe ao máximo as saídas e isto conduce a pensar noutra nova forma de facer a compra: mediante pedido directo ao supermercado ben vía online ou telefónica.
As principais cadeas de alimentación asentadas en Lugo xa notaron este cambio de costumes. Tanto é así que, actualmente, só dous garanten a entrega o mesmo día que se fai o pedido —trátase de Carrefour e o hipermercado Froiz— e unha máis, Gadis, admite, só nalgunhas tendas, por exemplo en Quiroga Ballesteros, os pedidos telefónicos pero cunha entrega retardada dunha semana. Máis tempo aínda tarda en ser entregada a compra no Eroski Center da Milagrosa, onde xa só se dan citas para mediados de mes. En cambio, se o cliente fai a compra no supermercado, lévanlla a casa. Iso mesmo ocorre tamén no Gadis de Ramón Ferreiro.
Carrefour leva aínda, practicamente a diario, a compra a casa pero, en cambio, non admite pedidos online
Entre tanto, en Mercadona hai días non collían pedidos por teléfono, nin tampouco realizaban repartición a domicilio. O mesmo ocorre no hipermercado Eroski, das Termas, onde só se está levando aos clientes electrodomésticos da sección de bazar que poden ser considerados de urxencia como, por exemplo, unha lavadora. “Non repartimos nada de alimentación e só levamos electrodomésticos que sexan moi necesarios pero, en todo caso, non entramos nunca nos domicilios, dado que o temos prohibido. Deixámolos na porta e tampouco os instalamos”, indican desde Eroski.
O hipermercado Froiz —como o resto das tendas— viu estes días máis que duplicado o seu volume de pedidos a domicilio. “Temos máis que nunca”, contan desde a tenda. Os encargos poden facerse por teléfono, online ou ao correo [email protected]. O custo é gratuíto se o valor da compra é superior a 50 euros. En caso contrario, cobraríanse 2 euros por repartición.
Carrefour leva aínda, practicamente a diario, a compra a casa pero, en cambio, non admite pedidos online. “Pode entregarse a compra o mesmo día ou, como moito, ao día seguinte pero non podemos garantir a entrega no día, depende da lista de espera que teñamos”, explica unha empregada do hipermercado.
As entregas limítanse só a 15 quilómetros de Lugo. O servizo custa 9 euros se non se é cliente habitual
Os pedidos só pódense facer por Whatsapp ao número 644 922468. Principalmente, as entregas realízanse a clientes maiores de 65 anos ou con risco ou imposibilidade para saír a facer a compra. Na mensaxe, deberán figurar o nome do cliente, o seu teléfono e dirección e se dispón do cartón do club Carrefour.
As entregas limítanse só a 15 quilómetros de Lugo. O servizo custa 9 euros se non se é cliente habitual. Tampouco está implantada aínda a venda online a través da web. Mentres, CIG denunciou este martes a falta de medidas de protección do persoal deste centro.
