Os xardíns do CEI-Nodus convertéronse este martes no escaparate do emprendemento lucense. Os 27 emprendedores da sexta edición do Inicia Coworking, o programa gratuíto que desenvolve o Concello en colaboración coa Escola de Organización Industrial, fixeron acto de presenza neste evento final tras formar parte dun proceso co que se busca aumentar as probabilidades de éxito empresarial en fases temperás de desenvolvemento.
Entre as empresas que formaron parte do proceso, la maioría pertencen a campos como o turismo, a enxeñería, a hostalería, a arte, a sustentabilidade ou a innovación, entre outros. Destes 21 negocios, 7 xa están a facturar e 4 teñen a súa propia sede no viveiro do CEI-Nodus.
Neste acto de clausura estivo presente a alcaldesa, Lara Méndez, que quixo destacar a valentía destes novos empresarios, que están á fronte de 21 iniciativas de negocio innovadoras. "Sodes a segunda xeración de empresas que axudamos a nacer en plena pandemia, polo que representades un exemplo de resistencia e vontade, calidades especialmente importantes nesta etapa de recuperación económica", declarou a rexedora.
A alcaldesa, que foi a encargada de abrir esta presentación en sociedade, tamén quixo facer fincapé na importancia de que un 60% das iniciativas presentadas estivesen lideradas por mulleres. "E algo que debemos dicir con orgullo, xa que é unha constante en todas as edicións do coworking que levamos", dixo respecto ao papel das mulleres.
Para a alcaldesa, que estivo acompañada pola concelleira de desenvolvemento local e emprego, Ana González, a creación de emprego é unha prioridade absoluta, polo que ven clave reter en Lugo o talento con iniciativas como estas que axuden a dinamizar o tecido empresarial. Neste sentido, Méndez quixo destacar que están a traballar na estratexia Lugo Transforma, coa que queren entrar no capital de novas empresas innovadoras -creadas ou instaladas en Lugo- a través dun fondo de investimento duns 12 millóns para impulsar empresas de impacto social e ambiental.
Xunto a elas, non faltou á cita a directora xeral da EOI, Neves Olivera. Esta quixo desexar moita sorte aos 27 participantes desta última edición do coworking, ademais de agradecer ao Concello as facilidades nas 6 entregas do evento.
